यवत, ता. ३० : गाडामोडी (ता. दौंड) येथील गुऱ्हाळावर काम करणाऱ्या उत्तर प्रदेशातील २३ वर्षीय मजुराचा जेसीबीखाली चिरडून मृत्यू झाल्यानंतर तो अपघात लपवण्यासाठी मृतदेह कारच्या डिकीत टाकून वाघोली-राहू रोडवर फेकल्याचा धक्कादायक प्रकार उघडकीस आला आहे. या प्रकरणी यवत पोलिसांनी जेसीबी चालक, मालक आणि अन्य चौघांविरुद्ध गुन्हा दाखल केला असून परिसरात मोठी खळबळ उडाली आहे.
मृत तरुणाचे नाव रामू शंभू पासी (वय २३, रा. कोला, जि. सीतापूर, उत्तर प्रदेश) असे असून, तो एप्रिल २०२६ पासून गाडामोडी येथील गुऱ्हाळावर मजूर म्हणून काम करत होता. याप्रकरणी त्याचा भाऊ राजू शंभू पासी (वय २१) याने यवत पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, १९ जून रोजी ठेकेदार तमरेज फरिदी यांनी फोन करून रामू बेपत्ता झाल्याची माहिती दिली. त्यानंतर कुटुंबीयांनी काही दिवस वाट पाहिली. मात्र तो घरी न परतल्याने राजू पासी हा उत्तर प्रदेशातून दौंड येथे आला आणि विविध ठिकाणी भावाचा शोध घेतला. अखेर २९ जून रोजी गुऱ्हाळावर चौकशी केली असता संपूर्ण धक्कादायक प्रकार समोर आला.
१९ जूनच्या मध्यरात्री सुमारे १.३० वाजता गुऱ्हाळावर जेसीबीचे काम सुरू असताना चालक आलम याच्या निष्काळजीपणामुळे झोपलेल्या रामू पासीवर जेसीबीचे चाक गेल्याने त्याचा जागीच मृत्यू झाला. घटनेनंतर जेसीबी मालक अविनाश बाळासो यादव याने ठेकेदाराला धमकी देत, “ही बाब कोणालाही सांगू नका, अन्यथा जिवंत सोडणार नाही,” अशी धमकी दिल्याचा आरोप आहे. त्यानंतर अविनाश यादव, गणेश हरिभाऊ जगताप, तसेच कल्लू आणि प्रधान इस्तकार यांनी संगनमत करून रामूचा मृतदेह कारच्या डिकीत टाकला.
पहाटेच्या सुमारास हे सर्वजण परत आल्यानंतर त्यांनी मृतदेह वाघोली-राहू रोडवर टाकून अपघाताचा बनाव केल्याची कबुली दिली. या संपूर्ण प्रकारामुळे अपघात लपवण्यासाठी पुरावे नष्ट करण्याचा प्रयत्न झाल्याचा गंभीर आरोप करण्यात आला आहे. या प्रकरणी यवत पोलीस ठाण्यात भारतीय न्याय संहितेच्या कलम १०६(१), २३८ आणि ३(५) अंतर्गत जेसीबी चालक आलम, जेसीबी मालक अविनाश यादव, गणेश जगताप तसेच कल्लू आणि प्रधान इस्तकार यांच्याविरुद्ध गुन्हा दाखल करण्यात आला आहे.
दरम्यान, या धक्कादायक घटनेमुळे गुऱ्हाळावरील मजुरांच्या सुरक्षिततेचा प्रश्न पुन्हा ऐरणीवर आला असून, अपघातानंतर मृतदेहाची विल्हेवाट लावून पुरावे नष्ट करण्याच्या आरोपामुळे प्रकरण अधिकच गंभीर बनले आहे. यवत पोलीस या संपूर्ण घटनेचा सखोल तपास करीत आहेत.
