उरुळी कांचन, (पुणे) : मुळा-मुठा नदीला आलेल्या भीषण पुरामुळे कोरेगाव मूळ (ता. हवेली) येथील कोल्हापूर पद्धतीच्या बंधाऱ्यावरून वाहून गेलेल्या 65 वर्षीय वृद्धाचा मृतदेह अखेर तीन दिवसानंतर सापडला. बुधवारी (ता. 05) सकाळी आठ वाजण्याच्या सुमारास मिरवडी (ता. दौंड) येथील एका शेतामध्ये पाण्याचा प्रवाह ओसरल्यानंतर हा मृतदेह अडकलेल्या स्थितीत मिळून आला. सोमवारी (ता. 03) रोजी सायंकाळी 6 ते सव्वासहा वाजण्याच्या सुमारास ही दुर्दैवी घटना घडली होती.
मिळालेल्या माहितीनुसार, गंगाधर साहेबराव गोते (वय-65, रा. बिवरी, ता. हवेली) असे पूरप्रवाहात वाहून जाऊन मृत्यू झालेल्या वृद्धाचे नाव आहे. सोमवारी सायंकाळी मुळा-मुठा नदीच्या पात्रातील पाणी पातळी वाढल्याने कोरेगाव मूळ बंधाऱ्यावरून वेगाने सुमारे एक फूट पाणी वाहत होते.
पाण्याचा वेग प्रचंड असतानाही गंगाधर गोते यांनी आपली दुचाकी (बाईक) पुराच्या प्रवाहातून पलीकडे नेण्याचा प्रयत्न केला. मात्र, पाण्याचा अंदाज न आल्याने मध्यभागी त्यांचा तोल गेला आणि ते दुचाकीसह पाण्याच्या तीव्र प्रवाहात वाहून गेले. गोते हे दुचाकीसह वाहून जात असतानाचा व्हिडिओ सर्वप्रथम पुणे प्राईम न्यूजने इंस्टाग्राम या सोशल मीडियावर व्हायरल केला होता.
घटना घडल्यापासूनच स्थानिक नागरिक, उरुळी कांचन पोलीस आणि आपत्ती व्यवस्थापन पथकाच्या मदतीने नदीपात्रात सलग तीन दिवस शोधकार्य सुरू होते. मात्र, पाण्याचा प्रचंड वेग आणि वाढत्या पाणी पातळीमुळे शोधमोहिमेत मोठे अडथळे येत होते. अखेर बुधवारी सकाळी पाण्याचा प्रवाह काहीसा कमी झाल्यानंतर दौंड तालुक्यातील मिरवडी गावच्या हद्दीतील एका शेतात गोते यांचा मृतदेह ग्रामस्थांना आढळून आला.
दरम्यान, शेतात मृतदेह दिसताच स्थानिकांनी तातडीने बिवरी येथील दत्तात्रय उत्तम गोते आणि पोलीस पाटील सागर गोते यांना फोनवरून माहिती दिली. माहिती मिळताच पोलीस व महसूल प्रशासनाचे अधिकारी घटनास्थळी दाखल झाले असून पुढील कार्यवाही सुरु केली आहे.
