पुणे : पुण्यातील प्रसिद्ध एफसी रोडवरील ‘वैशाली’ आणि ‘रूपाली’ या रेस्टॉरंटना अन्न व औषध प्रशासनाने (FDA) मोठा दणका दिला आहे. अन्न सुरक्षा आणि स्वच्छतेच्या नियमांचे पालन न केल्याचे तपासणीत आढळल्यानंतर दोन्ही रेस्टॉरंटचे अन्न व्यवसाय परवाने निलंबित करण्यात आले आहेत. या कारवाईमुळे शहरातील खाद्यप्रेमी आणि हॉटेल व्यावसायिकांमध्ये चर्चा सुरू झाली आहे.
महाराष्ट्र अन्न व औषध प्रशासनाच्या ‘सेफ फूड, सेफ महाराष्ट्र’ मोहिमेअंतर्गत 13 नोव्हेंबर रोजी एफसी रोड परिसरातील या दोन्ही रेस्टॉरंटची तपासणी करण्यात आली. यावेळी अन्नपदार्थांची साठवणूक, स्वच्छता आणि खाद्यपदार्थ तयार करण्याच्या ठिकाणांची पाहणी करण्यात आली. त्यात अनेक त्रुटी समोर आल्याची माहिती FDA कडून देण्यात आली.
वैशाली रेस्टॉरंटच्या तपासणीत 98 पैकी केवळ 58 गुण मिळाले. काही खाद्यपदार्थ उघड्यावर ठेवल्याचे आढळले. तसेच डोसा आणि उत्तप्पा तयार करण्यासाठी वापरण्यात येणारा तवा स्वच्छतागृहाच्या शेजारी असल्याचे तपासणी पथकाच्या निदर्शनास आले. अन्न तयार करण्याच्या ठिकाणी स्वच्छतेबाबत योग्य काळजी घेतली जात नसल्याचेही स्पष्ट झाले.
दुसरीकडे, रूपाली रेस्टॉरंटमध्येही अन्न सुरक्षा नियमांचे उल्लंघन झाल्याचे आढळले. तेथील काही खाद्यपदार्थ व्यवस्थित झाकून ठेवलेले नव्हते. तसेच काही पदार्थांवर वापरण्याची अंतिम तारीख नमूद करण्यात आली नव्हती.
या त्रुटी दूर केल्यानंतर दोन्ही रेस्टॉरंटची पुन्हा तपासणी केली जाणार आहे. FDA कडून लेखी परवानगी मिळेपर्यंत खाद्यपदार्थांची विक्री, पार्सल आणि घरपोच सेवा सुरू करता येणार नाही. त्यामुळे या दोन्ही रेस्टॉरंटना पुन्हा व्यवसाय सुरू करण्यासाठी प्रशासनाच्या तपासणीची आणि मंजुरीची प्रतीक्षा करावी लागणार आहे.
