पुणे : मराठा आंदोलक मनोज जरांगे पाटील यांनी पुन्हा एकदा राजकीय वर्तुळात खळबळ उडवून दिली आहे. लवकरच आणखी एक नवीन ऑडिओ क्लिप समोर आणण्याचे संकेत त्यांनी दिले असून, या क्लिपमुळे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांना धक्का बसू शकतो, असा दावा त्यांनी केला आहे. धाराशिव जिल्ह्याच्या दौऱ्यावर असताना येडशी येथे एका जळीत घटनेतील पीडित करंडे कुटुंबीयांच्या सांत्वनासाठी गेले असता त्यांनी माध्यमांशी संवाद साधला.
यापूर्वी जरांगे पाटील यांनी 500 कोटी रुपयांच्या कथित ऑडिओ क्लिपचा मुद्दा उपस्थित केला होता. या प्रकरणाची अद्याप योग्य चौकशी झाली नसून आपल्याला चौकशीसाठी बोलावले नसल्याचे त्यांनी सांगितले. या प्रकरणाची सखोल चौकशी करण्यासाठी एसआयटी नेमण्याची मागणी त्यांनी पुन्हा एकदा रेटून धरली आहे. तसेच भाजपने एकनाथ शिंदे यांच्यावर नेमके का आरोप केले आणि त्यामागचा उद्देश काय होता, हे स्पष्ट करावे, असे आवाहनही त्यांनी केले आहे.
राष्ट्रवादी काँग्रेसमधील विलीनीकरणाच्या चर्चेवर बोलताना जरांगे म्हणाले की, ही चर्चा केवळ भाजपवर दबाव आणण्यासाठी सुरू असण्याची शक्यता आहे. याशिवाय सुनील तटकरे, प्रफुल्ल पटेल आणि छगन भुजबळ यांच्यावर टीका करताना पक्षात अंतर्गत राजकारण जोरात सुरू असल्याचा दावा त्यांनी केला. एकनाथ शिंदे यांच्या पक्षातही अशाच प्रकारच्या अंतर्गत हालचाली सुरू असू शकतात, असे सूचक वक्तव्य त्यांनी केले.
या सर्व घडामोडीं दरम्यान आता जरांगे पाटील यांनी नवीन ऑडिओ क्लिपबाबत दिलेला इशारा आणि त्यातून कोणता नवीन गौप्यस्फोट होणार, याकडे संपूर्ण राजकीय वर्तुळाचे लक्ष लागले आहे.
