पुणे : शहरातील खराडी भागात मध्यरात्री एका संतापजनक प्रकारामुळे खळबळ उडाली आहे. मद्यधुंद अवस्थेत सार्वजनिक ठिकाणी राडा घालणाऱ्या दोघांनी थेट कर्तव्यावर असलेल्या पोलिसांशीच हुज्जत घालून त्यांना धक्काबुक्की केली. या घटनेमुळे परिसरात काही काळ तणावाचे वातावरण निर्माण झाले होते. कायद्याचा धाक नसलेल्या या तरुणांविरोधात पोलिसांनी कठोर पाऊल उचलले असून सरकारी कामात अडथळा आणल्याप्रकरणी गुन्हा नोंदवला आहे.
या प्रकरणी पोलिसांनी वाघोलीतील बायफ रोड परिसरात राहणाऱ्या अजय जयकुमार सावंत (वय 35) आणि किसन सूर्यभान झेंडे (वय 32) या दोघांवर कारवाई केली आहे. खराडी पोलीस ठाण्यातील शिपाई अशोक केदार यांनी या संदर्भात अधिकृत तक्रार दाखल केली आहे. बुधवारी रात्री सुमारे 1 वाजण्याच्या सुमारास खराडी पोलिसांचे पथक परिसरात रात्रगस्त घालत होते. त्यावेळी टेक्सास टॉवर सोसायटीच्या समोरील रस्त्यावर हे दोघेही दारूच्या नशेत मोठ्याने आरडाओरडा करत गोंधळ घालत असल्याचे पोलिसांच्या निदर्शनास आले.
सार्वजनिक शांततेचा भंग होत असल्याचे पाहून गस्तीवरील पोलीस अधिकारी आणि कर्मचाऱ्यांनी या तरुणांना शांत राहण्याची आणि घरी जाण्याची सूचना केली. मात्र, मद्याच्या धुंदीत असलेल्या सावंत आणि झेंडे यांना पोलिसांची ही समज अजिबात रुचली नाही. संतापाच्या भरात या दोघांनी थेट पोलीस उपनिरीक्षक म्हत्रे आणि पोलीस शिपाई केदार यांच्या अंगावर धावून जात त्यांच्याशी झटापट सुरू केली.
या झटापटीदरम्यान तरुणांनी पोलिसांना जोरदार धक्काबुक्की केली, ज्यामध्ये पोलीस शिपाई केदार यांच्या सरकारी गणवेशाचे बटणही तुटले. रात्रीच्या वेळी घडलेल्या या प्रकारामुळे पोलिसांच्या सुरक्षेचा प्रश्न पुन्हा एकदा ऐरणीवर आला आहे. अखेर पोलिसांनी परिस्थिती नियंत्रणात आणून दोन्ही आरोपींविरुद्ध भारतीय न्याय संहितेच्या संबंधित कलमान्वये सरकारी कामात अडथळा निर्माण केल्याचा गुन्हा दाखल केला असून पोलीस या प्रकरणाचा पुढील तपास करत आहेत.
