लोणावळा : लोणावळा शहरातील बाजारपेठ परिसरात असलेल्या जुन्या पोलीस ठाण्यावर अज्ञात व्यक्तीने दगडफेक केल्याचा प्रकार समोर आला आहे. या घटनेत पोलीस ठाण्यातील अधिकारी कक्षाच्या काचा फुटल्या आहेत. पोलीस ठाणे अनेक दिवसांपासून बंद असल्याचा फायदा घेत हा प्रकार करण्यात आल्याचा अंदाज व्यक्त केला जात आहे.
6 जुलै रोजी लोणावळा शहरात मोठ्या प्रमाणावर पूरस्थिती निर्माण झाली होती. या पुराचे पाणी जुन्या पोलीस ठाण्यातही शिरले होते. त्यामुळे पोलीस प्रशासनाने बाजारपेठेतील हे ठाणे बंद करून त्याचे कामकाज नवीन इमारतीत हलवले होते. तेव्हापासून जुनी इमारत वापराविना पडून होती. याच काळात अज्ञात व्यक्तीने दगडफेक करून अधिकारी कक्षाच्या काचा फोडल्याचे निदर्शनास आले.
दरम्यान, बाजारपेठ परिसरातील वाहतूक कोंडी कमी करणे आणि कायदा-सुव्यवस्था राखणे यासाठी जुने पोलीस ठाणे पुन्हा सुरू करण्याचा विचार पोलीस प्रशासनाकडून करण्यात आला आहे. याठिकाणी अधिकारी आणि कर्मचारी नियुक्त केले जाणार असल्याची माहिती प्रभारी पोलीस निरीक्षक महेश विधाते यांनी दिली होती. त्यानुसार इमारतीची साफसफाई करून ती लवकरच पुन्हा वापरात आणण्याची तयारी सुरू आहे.
मात्र, ठाणे बंद असल्यामुळे इमारतीच्या परिसरात अस्वच्छता पसरली आहे. अनेक कक्ष रिकामे असून तेथे कचरा साचल्याचे पाहणीदरम्यान दिसून आले. अधिकारी कक्षाच्या काचा नेमक्या कोणी फोडल्या, याबाबत अद्याप माहिती मिळालेली नाही.
पोलीस ठाणे बंद असले तरी सरकारी मालमत्तेचे नुकसान करणे चुकीचे असल्याची भावना नागरिकांनी व्यक्त केली आहे. शहराच्या सुरक्षिततेसाठी महत्त्वाची असलेली ही इमारत पुन्हा सुरू होण्यापूर्वी तिची स्वच्छता आणि दुरुस्ती करण्याची गरज आहे.
