पुणे : केंद्रीय गृहमंत्री अमित शहा यांच्या 15 आणि 16 नोव्हेंबर रोजी होणाऱ्या दोन दिवसीय पुणे दौऱ्याकडे सध्या संपूर्ण राज्याचे लक्ष लागले आहे. या दौऱ्यात भाजपच्या कार्यक्रमांपेक्षा राष्ट्रवादी काँग्रेसच्या नियोजनाला अधिक प्राधान्य मिळत असल्याची चर्चा राजकीय वर्तुळात रंगली आहे. विशेषतः राष्ट्रवादीच्या दोन्ही गटांच्या संभाव्य विलीनीकरणाच्या बातम्यांना वेग आलेला असताना, शहा यांचा हा दौरा अत्यंत महत्त्वपूर्ण मानला जात आहे.
या दौऱ्यात शहा यांच्या हस्ते पुणे जिल्हा परिषदेच्या आवारात दिवंगत उपमुख्यमंत्री अजित पवार यांच्या पुतळ्याचे अनावरण केले जाणार आहे. पुणे जिल्हा परिषदेवर राष्ट्रवादी काँग्रेसचे वर्चस्व असून, या कार्यक्रमाच्या निमित्ताने पक्षाकडून मोठे शक्तिप्रदर्शन करण्याची जोरदार तयारी सुरू आहे. या सोहळ्याच्या पूर्वतयारीचा आढावा घेण्यासाठी खासदार पार्थ पवार यांनी गुरुवारी जिल्हा परिषदेत जाऊन कार्यक्रमस्थळाची प्रत्यक्ष पाहणी केली.
दुसरीकडे, केंद्रीय राज्यमंत्री मुरलीधर मोहोळ यांच्या पुढाकाराने आयोजित करण्यात आलेल्या मॅरेथॉन स्पर्धेच्या उद्घाटनाला शहा उपस्थित राहणार नसल्याचे स्पष्ट झाले आहे. सुरुवातीला शहा या कार्यक्रमाला येणार असल्याची जोरदार चर्चा होती आणि त्यानुसार शहरभर फलकबाजी करून जाहिरातही करण्यात आली होती. परंतु, शहा रविवारी दुपारी पुण्यात दाखल होणार असल्याने ते मॅरेथॉनच्या उद्घाटनाला उपस्थित राहू शकणार नाहीत. यामुळे स्थानिक भाजप कार्यकर्त्यांमध्ये काहीशी नाराजी असल्याचे बोलले जात आहे. तसेच, या संपूर्ण दौऱ्यात पुणे शहरात त्यांचा इतर कोणताही मोठा जाहीर कार्यक्रम ठेवण्यात आलेला नाही.
रविवारी सायंकाळपासून ते सोमवार सकाळपर्यंत शहा यांच्या वेळापत्रकात कोणताही सार्वजनिक कार्यक्रम नियोजित नाही. या राखीव वेळेत ते महायुतीतील वरिष्ठ नेत्यांसोबत बंद दाराआड महत्त्वाची राजकीय खलबते करण्याची शक्यता वर्तवली जात आहे. त्यामुळे या दौऱ्यात राष्ट्रवादी काँग्रेसला मिळणारे झुकते माप आणि दोन्ही गटांच्या एकत्र येण्याबाबतच्या चर्चांना नेमकी कोणती दिशा मिळते, याकडे राजकीय विश्लेषकांचे डोळे लागले आहेत.
