पुणे : महानगरपालिकेने हडपसरमध्ये कोट्यवधी रुपये खर्च करून बांधलेली अत्याधुनिक शूटिंग रेंज सध्या कुलूपबंद पडली आहे. प्रशासनाच्या दुर्लक्षामुळे लाखो रुपयांच्या या क्रीडा संकुलाची दुरवस्था झाली असून, हजारो होतकरू खेळाडूंच्या भविष्याचा प्रश्न निर्माण झाला आहे.
काही वर्षांपूर्वी पालिकेने सुमारे 4 ते 5 कोटी रुपये खर्च करून 10,25 आणि 50 मीटर क्षमतेची ही शूटिंग रेंज उभी केली होती. मात्र, 2019-2020 मध्ये कंत्राट संपल्यानंतर नवीन निविदा प्रक्रिया रखडली आणि ही रेंज पूर्णपणे बंद पडली. देखभालीचा अभाव आणि सुरक्षेची वानवा यामुळे येथील महागडे साहित्य चोरीला गेले असून अनेक वस्तूंची नासधूस झाली आहे.
या रेंजमध्ये पुणे शहर आणि ग्रामीण भागातील साधारण 1 हजार ते 1 हजार 500 सामान्य कुटुंबातील मुले सराव करत होती. आता रेंज बंद असल्याने या खेळाडूंना सरावासाठी थेट बालेवाडीला जावे लागत आहे. रोजचा लांब प्रवास, वाहतुकीचा खर्च आणि शिक्षणाचा ताळमेळ बसवताना खेळाडूंना आणि त्यांच्या पालकांना मोठी कसरत करावी लागत आहे.
ही गंभीर समस्या सोडवण्यासाठी क्रांती शेतकरी संघाचे संस्थापक अमोल नाना तुपे यांनी आक्रमक भूमिका घेतली आहे. त्यांनी रेंजची तातडीने दुरुस्ती करून ती पुन्हा सुरू करण्याची जोरदार मागणी केली आहे. तसेच सुरक्षेसाठी सीसीटीव्ही बसवणे, अनुभवी प्रशिक्षक नेमणे आणि गरजू खेळाडूंना माफक दरात प्रवेश देण्याची मागणीही करण्यात आली आहे.
प्रशासन लवकरात लवकर यावर तोडगा काढून शूटिंग रेंज खेळाडूंसाठी चालू करणार का, हे येत्या काळात स्पष्ट होईल. जर प्रशासनाने दुर्लक्ष केले तर तीव्र आंदोलन करण्याचा इशारा अमोल नाना तुपे यांनी दिला आहे.
