पुणे : पिंपरी-चिंचवड परिसरातील मतदार यादीत मोठा गैरप्रकार झाल्याची धक्कादायक घटना उघडकीस आली आहे. घर बदल किंवा स्थलांतर न करताही हजारो नागरिकांचे पत्ते परस्पर दुसऱ्या मतदारसंघात वर्ग करण्यात आले आहेत. या प्रकारामुळे सुमारे 15000 हून अधिक मतदारांची नावे त्यांच्या मूळ यादीतून वगळली गेल्याचा गंभीर आरोप होत आहे. या प्रकरणाचे गांभीर्य लक्षात घेता निवडणूक आयोगाने सखोल चौकशी सुरू केली आहे.
राष्ट्रवादी काँग्रेस (शरदचंद्र पवार) पक्षाचे नेते अजित गव्हाणे यांनी या संदर्भात राज्याच्या मुख्य निवडणूक अधिकाऱ्यांकडे लेखी तक्रार दाखल केली होती. भोसरी विधानसभा मतदारसंघातील कायमस्वरूपी रहिवासी असलेल्या अनेक नागरिकांची नावे परस्पर इतरत्र हलवल्याचे त्यांनी पुराव्यासह निदर्शनास आणून दिले.
तांत्रिक तपासात असे समोर आले आहे की, पत्ता बदलण्यासाठी आवश्यक असलेला ‘फॉर्म नंबर 8’ मोठ्या प्रमाणावर ऑनलाइन भरण्यात आला होता. विशेष म्हणजे, हे अनेक अर्ज एकाच आयपी पत्त्यावरून सादर केले गेले आणि त्यासोबत पत्ता सिद्ध करण्यासाठी एकच वीजबिल जोडण्यात आले होते. या बिलावरील नाव आणि अर्जदाराचे नाव यामध्ये कोणतीही सुसंगती नव्हती. तरीही, मतदान केंद्रस्तरीय अधिकाऱ्यांकडून प्रत्यक्ष जागेवर जाऊन पडताळणी न करताच या अर्जांना मंजुरी देण्यात आली.
नियमानुसार, नवीन ठिकाणी पत्ता बदलण्याचा अर्ज मंजूर होताच निवडणूक आयोगाच्या संगणक प्रणालीद्वारे जुन्या मतदारसंघातून नाव कमी करण्याची प्रक्रिया आपोआप पार पडते. त्यामुळे मूळ रहिवाशांना कोणतीही पूर्वकल्पना न देता त्यांचे नाव यादीतून बाद झाले. एकाच वेळी इतक्या मोठ्या संख्येने पत्ते बदलण्याच्या अर्जांवर जिल्हा निवडणूक अधिकाऱ्यांनीही यापूर्वी शंका उपस्थित केली होती.
सध्या प्रशासनाने या गैरव्यवहाराला जबाबदार असणाऱ्या संबंधित अधिकाऱ्यांना नोटिसा बजावल्या असून दोषींवर कडक कारवाई करण्याचे निर्देश दिले आहेत. तसेच, ज्या नागरिकांची नावे चुकीच्या पद्धतीने कमी झाली आहेत, ती पुन्हा समाविष्ट करण्यासाठी ‘फॉर्म नंबर 6’ भरून घेण्याची कार्यवाही सुरू करण्यात आली आहे.
