राहुलकुमार अवचट
यवत, (पुणे) : यवत आणि परिसरात बेकायदेशीर व प्रतिबंधित तंबाखूजन्य पदार्थांची साठवणूक आणि विक्री करणाऱ्यांविरुद्ध अन्न व औषध प्रशासनाने बडगा उगारला आहे. यवत गावच्या हद्दीतील मलभारे वस्ती येथे सुरू असलेल्या एका गोडाऊनवर प्रशासनाने छापा टाकून तब्बल 6 लाख 9 हजार रुपयांचा बेकायदेशीर मुद्देमाल जप्त केला आहे. शासनाची कडक बंदी असतानाही कोणतीही खरेदी बिले नसताना हा मोठा साठा करून ठेवल्याचे उघड झाले असून, प्रशासनाने हे गोडाऊन सीलबंद केले आहे.
याप्रकरणी गोडाऊन चालक आरोपी नितीन रोहिदास मलभारे (रा. यवत – मलभारे वस्ती, ता. दौंड, जि. पुणे) याच्या विरोधात यवत पोलीस ठाण्यात गुन्हा दाखल करण्यात आला आहे. अन्न सुरक्षा अधिकारी क्रांती बारवकर यांनी यवत पोलीस ठाण्यात फिर्याद दिली आहे.
मिळालेल्या माहितीनुसार, अन्न सुरक्षा अधिकारी क्रांती बारवकर यांना मलभारे वस्ती येथील एका गोडाऊनमध्ये प्रतिबंधित तंबाखूजन्य पदार्थांची बेकायदेशीर साठवणूक केल्याची कडक माहिती मिळाली होती. त्यानुसार त्यांनी तात्काळ ‘११२’ या आपत्कालीन क्रमांकावर फोन करून पोलीस प्रशासन आणि पंचांना घटनास्थळी बोलावून घेतले.
सर्व टीमने मिळून या गोडाऊनची तपासणी केली असता, त्या ठिकाणी केसरयुक्त विमल पान मसाला, एम सुगंधित गोल्ड तंबाखू, आरएमडी (RMD) पान मसाला, व्ही १ (V1) सुगंधित तंबाखू, राजानिगंधा पान मसाला, जाफराणी जर्दा, असा 6 लाख 9 हजार रुपयांचा बेकायदेशीर मुद्देमाल आढळून आला.
आरोपी नितीन मलभारे याने राज्यात तंबाखूजन्य पदार्थांवर कडक बंदी असतानाही हा प्रचंड साठा गोडाऊनमध्ये दडवून ठेवला होता. पोलिसांच्या आणि पंचांच्या समक्ष या मालाच्या खरेदीबाबत विचारणा केली असता, त्याच्याकडे कोणतीही अधिकृत खरेदी बिले मिळून आली नाहीत. अखेर अन्न व औषध प्रशासनाच्या परिपत्रकानुसार, अधिकाऱ्यांनी हे संपूर्ण गोडाऊन जागेवरच सीलबंद केले आहे.
दरम्यान, या मोठ्या कारवाईनंतर अन्न सुरक्षा अधिकारी क्रांती बारवकर यांनी स्वतः यवत पोलीस स्टेशन गाठून आरोपी नितीन मलभारे याच्याविरुद्ध अधिकृत फिर्याद दिली. पोलिसांनी या फिर्यादीवरून गुन्हा दाखल केला आहे. पुढील कडक तपास यवत पोलीस ठाण्याच्या सहाय्यक पोलीस निरीक्षक सुवर्णा गोसावी या करत आहेत. ‘एफडीए’ आणि पोलिसांच्या या कडक संयुक्त कारवाईमुळे दौंड तालुक्यातील तंबाखू माफियांचे धाबे कडक दणाणले आहेत.
