पुणे : गेल्या काही दिवसांपासून पश्चिम आशियातील तणावाचा थेट फटका जागतिक बाजारपेठेला बसला होता. अमेरिका, इस्त्रायल आणि इराणमधील वादामुळे तणावाचे वातावरण निर्माण झाले होते. याचा सर्वाधिक परिणाम इंधन पुरवठ्यावर झाला. विशेषतः होर्मुज समुद्रधुनी इराणने काही काळासाठी बंद केल्यामुळे तेलाचे टँकर आणि कार्गो वाहतूक विस्कळीत झाली होती.व्यावसायिक गॅस सिलेंडरच्या किमती घसरल्यानंतर घरगुती गॅस किती दराने उतरणार याकडे ग्राहकाच्या नजरा लागल्या आहेत.
सध्या जागतिक बाजारात कच्च्या तेलाच्या किमतीत मोठी घसरण दिसून येत आहे. जर ही घसरण काही काळ अशीच स्थिर राहिली, तर त्याचा सकारात्मक परिणाम भारतीय बाजारपेठेवर नक्कीच होईल. यामुळेच ऑगस्ट महिन्यात एलपीजी सिलेंडरच्या किमतीत कपात होण्याची दाट शक्यता वर्तवली जात आहे. तेल कंपन्या यावर बारीक लक्ष ठेवून आहेत. तरीही, यासंदर्भात केंद्र सरकार किंवा पेट्रोलियम कंपन्यांकडून अद्याप कोणतीही अधिकृत घोषणा झालेली नाही.
सध्या विविध महानगरांमध्ये घरगुती एलपीजी सिलेंडरचे दर
दिल्ली: 942.00 रुपये
मुंबई: 941.50 रुपये
कोलकाता: 968.00 रुपये
चेन्नई: 957.50 रुपये
साधारणपणे, सरकारी तेल कंपन्या दर महिन्याच्या पहिल्या तारखेला गॅस सिलेंडरच्या किमती जाहीर करतात. कच्च्या तेलाचे दर दीर्घकाळ कमी राहिल्यास, कंपन्या ग्राहकांना दिलासा देण्यासाठी किमती कमी करण्यावर विचार करू शकतात. त्यामुळे, पुढील महिन्याच्या सुरुवातीला घरगुती गॅस ग्राहकांना दिलासा मिळण्याची अपेक्षा आहे.
