राहुलकुमार अवचट
केडगाव : देशात 26 नोव्हेंबर हा दिवस संविधान दिन म्हणून साजरा केला जातो. याच पार्श्वभूमीवर ‘एक हात मदतीचा फाउंडेशन’ यांच्या वतीने केडगाव परिसरातील चौफुला येथे विटभट्टीवर असलेल्या लहान मुलांबरोबर अनोख्या पद्धतीने संविधान दिन साजरा करण्यात आला.
आपल्याला एकता, एकात्मता, समता आणि बंधुता यांची मूल्ये स्विकारण्यास व अंगीकारण्यास महत्त्वाची भूमिका बजावणाऱ्या केडगाव येथील एक हात मदतीचा फाउंडेशन ग्रुपने संविधान दिनाचे निमित्त साधले. त्यानुसार, ‘हाक तुमची, साथ आमची’ या ब्रिदवाक्याला साजेसे असे आपल्या एक हात मदतीचा शैक्षणिक अभियानात सहभागी होऊन विटभट्टीवरील २५ लहान मुलांना शैक्षणिक साहित्य वाटप करून खऱ्या अर्थाने संविधान दिनाचे दर्शन आचरणातून दाखवून दिले. ‘एक हात मदतीचा फाउंडेशन’च्या माध्यमातून विटभट्टीवरील अनेक मुलांना नवीन कपडे, स्कूल बॅग यांचे वाटप करण्यात आले.
अजूनही मुलांना स्वेटर, बूट, चप्पल, पाण्याची बाटली यासारख्या गोष्टींची आवश्यकता असून, समाजाच्या प्रतिसादाच्या प्रतिक्षेत आहेत. आपली फुल न फुलाची पाकळी म्हणून मदत करण्यासाठी एक हात मदतीचा फाउंडेशनला सहकार्य करावे, असे आवाहन करण्यात आले. यावेळी धनराज मासाळ, शबनम डफेदार, गोरख मांडगे, शिक्षक यशवंत भारती यांसह अनेक पदाधिकारी उपस्थित होते.
