न्हावरे: शिरूर तालुक्यातील पिंपळाची वाडी (निमोणे) येथे पाण्याच्या इलेक्ट्रिक मोटरच्या वादातून एका शेतकऱ्यावर कुऱ्हाडीने डोक्यात वार करून जीवे मारण्याचा प्रयत्न केल्याचा धक्कादायक प्रकार सोमवारी (दि. २७) सकाळी साडे अकराच्या सुमारास घडला. या घटनेत शेतकरी गंभीर जखमी झाला असून, त्याच्यावर शिरूर येथील ग्रामीण रुग्णालयात उपचार सुरू आहेत. या प्रकरणी एका व्यक्तीसह दोन अनोळखी इसमांविरुद्ध शिरूर पोलीस ठाण्यात गुन्हा दाखल करण्यात आला आहे.
या घटनेबाबत शिरूर पोलिसांनी दिलेल्या माहितीनुसार, संपत गणपत काळे (वय ५५, रा. पिंपळाची वाडी-निमोणे, ता.शिरूर, जि. पुणे) हे घोड नदीकाठी असलेल्या त्यांच्या पाण्याच्या इलेक्ट्रिक मोटरची पाहणी करण्यासाठी गेले होते. मोटारीवरील काट्या बाजूला करून पाणी तपासत असताना,अज्ञात व्यक्तीने संपत काळे यांच्या पाठीवर दगड फेकून मारला. त्यानंतर संजय राजाराम काळे यांनी समोर येऊन “तुझी मोटर आताच्या आता उचल, नाहीतर तुला सोडणार नाही,” अशी धमकी दिली. त्यानंतर हातातील कुऱ्हाडीने संपत काळे यांच्या डोक्यावर जोरदार वार केल्याचा आरोप फिर्यादीने फिर्यादीमध्ये केला आहे. या हल्ल्यात संपत काळे यांच्या डोक्याला गंभीर दुखापत होऊन मोठ्या प्रमाणात रक्तस्राव झाला.
जखमी अवस्थेत संपत काळे यांनी सुरेश बाळासो काळे यांना फोन करून मदत मागितली. त्यानंतर मयूर काळे व शिवाजी काळे यांनी घटनास्थळी धाव घेत त्यांना उपचारासाठी निमोणे येथून शिरूर ग्रामीण रुग्णालयात पुढील उपचारासाठी दाखल केले.
या प्रकरणी फिर्यादी संपत काळे यांच्या तक्रारीवरून संजय राजाराम काळे व दोन अनोळखी इसमांविरुद्ध शिरूर पोलीस ठाण्यात विविध कलमांच्या अंतर्गत गुन्हा दाखल करण्यात आला आहे. या घटनेचा पुढील तपास पोलीस निरीक्षक विनोद पाटील यांच्या मार्गदर्शनाखाली शिरूर पोलीस करीत आहेत.
