पुणे: दिवाळीत फटाके फोडण्याच्या कारणावरून सुरू झालेल्या वादाने पुण्यात गंभीर स्वरूप धारण केले. नाना पेठ परिसरात दोन गटांमध्ये झालेल्या भांडणात वडिलांना वाचवण्यासाठी पुढे आलेल्या 21 वर्षीय तरुणीवर धारदार शस्त्राने हल्ला करण्यात आला. या घटनेत आकांक्षा नितीन साळवे ही तरुणी गंभीर जखमी झाली असून तिच्यावर ससून रुग्णालयात उपचार सुरू आहेत. या प्रकरणी पोलिसांनी दोघांना अटक केली आहे.
मिळालेल्या माहितीनुसार, आकांक्षाचे वडील नितीन साळवे हे रिक्षा चालवतात. दिवाळीनिमित्त नातेवाईकांची भेट घेऊन ते पत्नी आणि मुलीसोबत घरी परतत होते. त्यावेळी इमारतीजवळ काही जण फटाके फोडत होते. याचदरम्यान एका फटाक्यावरून त्यांच्या रिक्षाचे चाक गेल्याने संबंधित व्यक्तींशी त्यांचा वाद झाला. या वादातून साळवे यांना शिवीगाळ आणि मारहाण करण्यात आली. नंतर हा प्रकार शांत झाला आणि सर्वजण घरी गेले.
मात्र, 9 नोव्हेंबर रोजी मध्यरात्री सुमारे 1.30 वाजण्याच्या सुमारास जुन्या वादाचा विषय पुन्हा पुढे आला. होप हॉस्पिटलजवळ थांबलेल्या नितीन साळवे यांच्याजवळ काही जण आले आणि त्यांनी पुन्हा मारहाण सुरू केली. वडिलांना मारहाण होत असल्याची माहिती मिळताच आकांक्षा, तिची आई, बहीण आणि भाचा घटनास्थळी पोहोचले.
यावेळी एका आरोपीने धारदार शस्त्राने नितीन साळवे यांच्यावर वार करण्याचा प्रयत्न केला. मात्र, वडिलांना वाचवण्यासाठी मध्ये पडलेल्या आकांक्षाच्या डोक्याला हा वार लागला. गंभीर दुखापत झाल्याने ती रक्तबंबाळ होऊन बेशुद्ध पडली. त्यानंतर हल्लेखोर घटनास्थळावरून पळून गेले.
या प्रकरणी समर्थ पोलीस ठाण्यात तक्रार दाखल करण्यात आली आहे. विनायक कांबळे आणि आर्यन शिंदे या दोघांना अटक करण्यात आली असून संदेश जाधव आणि त्याच्या साथीदारांविरोधात खुनाच्या प्रयत्नाचा गुन्हा नोंदवण्यात आला आहे. पोलिसांकडून पुढील तपास सुरू आहे.
