दौंड, ता. 8 : कुरकुंभ (ता. दौंड ) एमआयडीसीतील एका रासायनिक कंपनीच्या संचालकाला वारंवार व्हॉट्सॲप कॉल करून धमकावणे, तसेच कंपनीकडून प्रक्रिया केलेला सॉल्व्हंट माल आणि मोकळे ड्रम ठरवून दिलेल्या दराने खरेदी करण्याची सक्ती केल्याचा धक्कादायक प्रकार उघडकीस आला आहे.
याप्रकरणी दिपक मुरारजी ठक्कर (वय ५७, कंपनी संचालक, रा. मुलुंड, पश्चिम मुंबई) यांनी दौंड पोलीस ठाण्यात फिर्याद दिली आहे. त्यानुसार शरद शितोळे (रा. पांढरेवाडी, ता. दौंड) याच्याविरुद्ध भारतीय न्याय संहिता कलम 308(4) आणि 351(2) अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी दिपक ठक्कर यांची कंपनी कुरकुंभ एमआयडीसीतील प्लॉट क्रमांक A/84 आणि A/89 येथे फार्मा व प्रिंटिंग केमिकल तयार करते. कंपनीच्या संचालकांना सप्टेंबर 2025 पासून शरद शितोळे याच्याकडून वारंवार व्हॉट्सॲप कॉल येत होते. कंपनीने प्रक्रिया केलेला सॉल्व्हंट माल त्याने सांगेल त्या दराने विकावा आणि कंपनीसाठी लागणारे मोकळे ड्रमही त्याच्याकडूनच खरेदी करावेत, अशी मागणी करीत होता. आणि या मागण्या मान्य न केल्यास कंपनीविरुद्ध खोट्या तक्रारी करण्याची आणि कंपनी बंद पाडण्याची धमकी देत होता. तसेच, कंपनीच्या बाहेर पडल्यावर एकेकाचे पाय तोडण्याची धमकी दिली होती.
शितोळे याने कंपनीशी कोणताही अधिकृत पत्रव्यवहार किंवा ई-मेलद्वारे व्यवहार न करता धमकावून मालाची मागणी केली आहे. त्याचप्रमाणे, महाराष्ट्र प्रदूषण नियंत्रण मंडळ (MPCB) आणि औद्योगिक सुरक्षा व आरोग्य संचालनालय (DISH) यांच्याकडे कंपनीविरुद्ध खोट्या तक्रारी करून त्रास दिला आहे. कुरकुंभ एमआयडीसीतील इतर उद्योजकांनाही अशाच प्रकारे धमकावून मालाची मागणी केली जात असल्याचा आरोप फिर्यादीने केला आहे.
दरम्यान, शितोळे याच्या दहशतीमुळे उद्योजक तक्रार करण्यास धजावत नसल्याचेही त्यांनी सांगितले. कुरकुंभ इंडस्ट्रीज असोसिएशनच्या पदाधिकाऱ्यांनी धीर दिल्यानंतर आपण पोलिसांत तक्रार दाखल केल्याचे फिर्यादीने नमूद केले आहे. या प्रकरणी दौंड पोलिस ठाण्यात गुन्हा दाखल करण्यात आला असून, पुढील तपास सहाय्यक पोलीस निरीक्षक गवळी करीत आहेत.
