पुणे: पुणे जिल्ह्यातील मावळ तालुक्यातून पुन्हा एकदा दुर्दैवी घटना समोर आली आहे. इंद्रायणी नदी परिसरातील कुंडमळा येथे 24 वर्षीय प्रथमेश लोणारी याचा पाण्यात बुडून मृत्यू झाला आहे. सलग तिसऱ्या दिवशी अशा प्रकारची घटना घडल्याने परिसरात हळहळ व्यक्त केली जात आहे.
मिळालेल्या माहितीनुसार, प्रथमेश लोणारी हा पिंपरी-चिंचवडमधील फुगेवाडी परिसरातील रहिवासी असून तो आपल्या मित्रांसोबत फिरण्यासाठी कुंडमळा येथे गेला होता. तेथील डोहात उतरताना पाण्याचा अंदाज चुकल्याने तो बुडाल्याची प्राथमिक माहिती समोर आली आहे.
घटनेची माहिती मिळताच मावळ रेस्क्यू टीम आणि तळेगाव आंबी एमआयडीसी पोलिसांनी घटनास्थळी धाव घेत शोधमोहीम सुरू केली. काही वेळाच्या प्रयत्नांनंतर डोहातून प्रथमेशचा मृतदेह बाहेर काढण्यात आला.
कुंडमळा परिसरात इंद्रायणी नदीचा प्रवाह वेगवान असून ठिकठिकाणी भोवरे आणि रांजणखळगे आहेत. त्यामुळे येथे पाण्यात उतरणे धोकादायक असल्याचे वारंवार सांगितले जाते. तरीही अनेक पर्यटक निसर्गसौंदर्याचा आनंद घेताना किंवा मोबाईलवर फोटो-व्हिडिओ काढताना सुरक्षेच्या सूचनांकडे दुर्लक्ष करतात.
स्थानिक प्रशासनाने या ठिकाणी पाण्यात उतरण्यास बंदी घातली असतानाही काही जण नियम धाब्यावर बसवून पाण्यात उतरतात. त्यामुळे अशा दुर्घटना घडत असल्याचे समोर येत आहे. प्रथमेश लोणारी नेमका बंदी असलेल्या भागात कसा गेला याचा पुढील तपास पोलीस करत आहेत.
दरम्यान, मावळ आणि पिंपरी-चिंचवड परिसरातील नागरिकांसाठी कुंडमळा हे लोकप्रिय पर्यटनस्थळ बनले आहे. मात्र, वाढत्या अपघातांच्या घटनांमुळे येथे सुरक्षेचा प्रश्न ऐरणीवर आला आहे. नागरिकांनी आणि पर्यटकांनी पाण्यात उतरताना अधिक काळजी घ्यावी, असे आवाहन प्रशासनाकडून करण्यात येत आहे.
