Kedgaon Murder Case केडगाव, ता. १३ : दौंड तालुक्यातील केडगाव परिसरात एका कामगाराचा निर्घृण खून करून घटनास्थळावरून फरार होण्यासाठी शेतकऱ्याची जीप चोरल्याची थरारक घटना उघडकीस आली आहे. रात्री झालेल्या भांडणानंतर कामगाराचा मृत्यू झाल्याचे लक्षात येताच तिघांनी घाबरून थेट घरासमोर उभी असलेली जीप चोरून पलायन केल्याचा धक्कादायक प्रकार समोर आला आहे. मात्र, चोरीची जीप श्रीगोंद्यात आढळल्याने संपूर्ण गुन्ह्याचा पर्दाफाश झाला. या घटनेमुळे केडगाव परिसरात मोठी खळबळ उडाली असून, “कामगारांतील वाद थेट खुनापर्यंत कसा पोहोचला?” याची चर्चा सुरू आहे. Kedgaon Murder Case
नंदू किसन जाधव (रा. वांबोरी, ता. राहुरी), राजेंद्र मच्छिंद्र केदारी (रा. सोनाई, ता. नेवासा) आणि आकाश रमेश कांबळे (रा. बासुंबा, जि. हिंगोली) यांच्याविरोधात यवत पोलीस ठाण्यात खून आणि वाहन चोरीचा गंभीर गुन्हा दाखल करण्यात आला आहे. याप्रकरणी अजय अर्जुन गुळमे (वय ४८, रा. केडगाव, जुना टोलनाका) यांनी यवत पोलीस ठाण्यात फिर्याद दिली आहे. कामगारांच्या भांडणातून उघड झालेल्या या रक्तरंजित घटनेमुळे केडगाव परिसर हादरला असून, आरोपींनी मृतदेह मागे सोडून चोरीच्या जीपमधून पलायन केल्याने नागरिकांमध्ये भीतीचे वातावरण निर्माण झाले आहे. Kedgaon Murder Case
पोलिसांनी दिलेल्या माहितीनुसार, फिर्यादी गुळमे हे शेती व्यवसाय करतात. त्यांनी दीड वर्षांपासून केडगाव येथील गट नंबर २२२ मधील जमीन खंडाने घेतली असून, त्याच परिसरात बंद पडलेल्या हॉटेलमध्ये बांधकामावरील कामगार राहत होते. ११ मेच्या रात्री गुळमे यांनी त्यांची महिंद्रा कंपनीची जीप (एमएच १२ डब्ल्यू ५२०७) घरासमोर उभी केली होती. दुसऱ्या दिवशी सकाळी वाहन जागेवर नसल्याचे लक्षात येताच त्यांनी परिसरात शोध घेतला. वाहन चोरीची माहिती त्यांनी नातेवाईक आणि मित्रांना वॉट्सअॅपवरून दिली. Kedgaon Murder Case
दरम्यान, गुळमे यांच्या मुलाच्या मित्राने श्रीगोंदा येथे संशयास्पद अवस्थेत तीच जीप पाहिल्याची माहिती दिली. त्यानंतर गुळमे, त्यांचा मुलगा आणि नातेवाईक श्रीगोंद्यात पोहोचले. तेथे महात्मा फुले चौकात चोरीची जीप मिळून आली. गाडीत तिघे इसम बसलेले होते. त्यातील नंदू किसन जाधव हा बांधकामावर काम करणारा मजूर असल्याचे समोर आले. चौकशीदरम्यान आरोपींनी धक्कादायक खुलासा केला. रात्री बंद पडलेल्या हॉटेलमध्ये जेवण करताना कामगारांमध्ये जोरदार भांडण झाले. त्या भांडणात सुभाष नावाच्या कामगाराला गंभीर मार लागला आणि तो निपचित पडला. तो मृत झाल्याच्या भीतीने आपण घाबरलो आणि घटनास्थळावरून पळण्यासाठी जीप चोरल्याची कबुली आरोपींनी पोलिसांना दिली. Kedgaon Murder Case
यानंतर सर्व आरोपींना घेऊन गुळमे आणि त्यांच्या साथीदारांनी केडगावमधील हॉटेल परिसरात धाव घेतली. तेथे हॉटेलसमोरील ओट्यावर सुभाष नावाचा कामगार मृतावस्थेत आढळला. त्याच्या पोटावर आणि गळ्यावर गंभीर मारहाणीचे व्रण दिसून आले. या प्रकारामुळे उपस्थितांच्या अंगावर काटा आला. या प्रकरणी नंदू किसन जाधव,राजेंद्र मच्छिंद्र केदारी आणि आकाश रमेश कांबळे यांच्याविरोधात भारतीय न्याय संहितेच्या कलम १०३, ३(४) आणि ३०३(२) अंतर्गत गुन्हा दाखल करण्यात आला आहे. पुढील तपास पोलीस उपनिरीक्षक वागज करत आहेत. Kedgaon Murder Case
