Breaking News दौंड, ता. १३ : पाटस (ता. दौंड) येथील आंबिकानगर परिसर सोमवारी रात्री अक्षरशः रक्ताने माखला. जुन्या किरकोळ वादाचा राग मनात धरून तिघांनी एका तरुणावर भररस्त्यात कोयत्याने जीवघेणा हल्ला केल्याची धक्कादायक घटना घडली. विशेष म्हणजे, आई-वडिलांच्या डोळ्यासमोरच मुलाच्या डोक्यात कोयत्याचा घाव घालण्यात आल्याने परिसरात भीती आणि संतापाचे वातावरण निर्माण झाले आहे.या हल्ल्यात गंभीर जखमी झालेल्या संदीप रसाळ याच्यावर खासगी रुग्णालयात उपचार सुरू असून, त्याची प्रकृती चिंताजनक असल्याची माहिती समोर येत आहे. Breaking News
यवत पोलिसांनी प्रमोद उर्फ बापू शरद चव्हाण, बायडाबाई शरद चव्हाण आणि जय प्रमोद चव्हाण (सर्व रा. आंबिकानगर, पाटस, ता. दौंड) यांच्याविरोधात गंभीर गुन्हा दाखल केला आहे. याप्रकरणी कांताबाई शंकर रसाळ यांनी यवत पोलीस ठाण्यात फिर्याद दिली आहे. Breaking News
पोलिसांनी दिलेल्या माहितीनुसार, फिर्यादी कांताबाई रसाळ यांचा मुलगा संदीप हा वरवंड येथे चालक म्हणून काम करतो. महिनाभरापूर्वी आरोपी प्रमोद चव्हाण याने दारूच्या नशेत संदीपला विनाकारण शिवीगाळ केली होती. त्यानंतर दोघांमध्ये वाद झाला होता. त्या वादातूनच हा जीवघेणा हल्ला झाल्याचा आरोप करण्यात आला आहे. ११ मे रोजी रात्री जेवण झाल्यानंतर संदीप हा शेजारी मंगेश पाचंगे यांच्या घरासमोर मोबाईल पाहत बसला होता. त्यावेळी प्रमोद चव्हाण हा त्याची आई आणि मुलासह तेथे पोहोचला. काही क्षणांतच संतापलेल्या प्रमोदने लपवून आणलेला लोखंडी कोयता बाहेर काढत संदीपच्या डोक्यावर जोरदार वार केला. Breaking News
अचानक झालेल्या या हल्ल्याने संदीप जागीच रक्ताच्या थारोळ्यात कोसळला. मुलाचा जीव वाचवण्यासाठी धावलेल्या वडील शंकर रसाळ यांनाही आरोपींनी बेदम मारहाण केली. परिसरातील नागरिक धावत आल्याने पुढील अनर्थ टळला. मात्र, आरोपींनी जाताना “तुम्हाला परत सोडणार नाही,” अशी धमकी देत परिसरात दहशत निर्माण केली. रक्तबंबाळ अवस्थेतील संदीपला प्रथम गावातील खासगी दवाखान्यात नेण्यात आले. त्यानंतर डोक्याला गंभीर दुखापत झाल्याने त्याचे तातडीने स्कॅन करण्यात आले आणि पुढील उपचारासाठी रुग्णालयात दाखल करण्यात आले.
या घटनेमुळे पाटस परिसरात मोठी खळबळ उडाली असून, “किरकोळ वादातून थेट खुनाच्या प्रयत्नापर्यंत मजल कशी जाते?” असा सवाल नागरिकांकडून उपस्थित केला जात आहे. यवत पोलिसांनी भारतीय न्याय संहितेच्या विविध कलमांनुसार गुन्हा दाखल केला असून पुढील तपास पोलीस उपनिरीक्षक गाडेकर करत आहेत.
