Pune पुणे, ता. 13 : विवाहाच्या नावाखाली फसवणुकीचे प्रकार वाढत असतानाच पुण्यात एक संतापजनक आणि धक्कादायक प्रकार उघडकीस आला आहे. विवाह संकेतस्थळावरून ओळख झालेल्या एका व्यक्तीने सॉफ्टवेअर इंजिनिअर तरुणीला प्रेमाच्या जाळ्यात ओढत लग्नाचे आमिष दाखवले आणि तब्बल २१ लाख रुपये उकळले. एवढ्यावरच न थांबता, पैसे परत देण्याच्या बहाण्याने आरोपीने तरुणीच्या हातात थेट ‘चिल्ड्रन्स बँक’च्या बनावट नोटांची पुडकी ठेवत तिची क्रूर थट्टा केली. या घटनेमुळे शहरात खळबळ उडाली आहे. Pune
या प्रकरणी सिंहगड रोड पोलिसांनी गोरखनाथ भाऊ गावंडकर (वय ४१) याला अटक केली असून, त्याच्याविरोधात फसवणुकीचा गुन्हा दाखल करण्यात आला आहे. नांदेड सिटी परिसरात राहणाऱ्या ३२ वर्षीय सॉफ्टवेअर इंजिनिअर तरुणीने विवाहविषयक संकेतस्थळावर स्वतःची माहिती नोंदवली होती. त्यानंतर तिची ओळख गोरखनाथ गावंडकर याच्याशी झाली. आरोपीने स्वतःचा पालघर येथे रेस्टॉरंट आणि बार व्यवसाय असल्याचे सांगत श्रीमंतीची खोटी प्रतिमा निर्माण केली. सुरुवातीला गोड बोलणे, काळजी घेणे आणि लग्नाची स्वप्ने दाखवत त्याने तरुणीचा पूर्ण विश्वास जिंकला. Pune
विश्वास संपादन केल्यानंतर आरोपीने आर्थिक अडचणी, व्यवसायातील व्यवहार आणि गुंतवणुकीची कारणे सांगत वेळोवेळी तरुणीकडून मोठ्या रकमा उकळण्यास सुरुवात केली. लग्न होणारच आहे, या विश्वासातून तरुणीनेही त्याला पैसे दिले. काही महिन्यांतच आरोपीने तिच्याकडून तब्बल २१ लाख रुपये घेतल्याचे समोर आले आहे. Pune
दरम्यान, तरुणीने पैसे परत मागण्यास सुरुवात केल्यानंतर आरोपीने “मी तुला थेट ५० लाख रुपये देतो,” असे सांगत मोठी रक्कम देण्याचे आमिष दाखवले. मात्र, जेव्हा त्याने दिलेली बॅग उघडण्यात आली, तेव्हा त्यामध्ये खऱ्या नोटांऐवजी ‘चिल्ड्रन्स बँक’ असे लिहिलेल्या खेळातील बनावट नोटांचे पुडके असल्याचे पाहून तरुणी हादरून गेली. Pune
आपली फसवणूक झाल्याचे लक्षात येताच तिने सिंहगड रोड पोलीस ठाण्यात धाव घेत तक्रार दाखल केली. पोलिसांनी तातडीने कारवाई करत आरोपीला अटक केली असून, मार्च २०२५ पासून हा प्रकार सुरू असल्याचे तपासात समोर आले आहे. या घटनेमुळे विवाह संकेतस्थळांच्या माध्यमातून वाढणाऱ्या फसवणुकीबाबत पुन्हा एकदा प्रश्नचिन्ह निर्माण झाले आहे. “प्रेम, लग्न आणि विश्वास” यांचा आधार घेत सायबर व आर्थिक फसवणूक करणाऱ्या टोळ्यांविरोधात पोलिसांनी नागरिकांना सतर्क राहण्याचे आवाहन केले आहे. Pune
