पुणे: पुण्यात पीएमपी बसमध्ये धक्कादायक प्रकार घडला असून महिला वाहकावर चाकूने हल्ला करण्यात आला आहे. सुरेखा बळीराम भालेराव (वय 38) या या हल्ल्यात जखमी झाल्या आहेत. ही घटना 15 एप्रिल रोजी रात्री सुमारे 8 वाजता पुणे स्टेशन परिसरातील अलंकार चौकात घडली.
मिळालेल्या माहितीनुसार, महापालिका भवन ते विमाननगर मार्गावरील पीएमपी बस पुणे स्टेशन परिसरातून निघाली होती. यावेळी सुरेखा भालेराव या नेहमीप्रमाणे प्रवाशांना तिकीट देत होत्या. त्याच वेळी एका तरुणाला त्यांनी तिकीट काढण्यास सांगितले. मात्र, या कारणावरून त्या तरुणाने त्यांच्याशी वाद घालत शिवीगाळ सुरू केली.
यावर भालेराव यांनी त्याला शिवीगाळ करू नको, अन्यथा बसमधून खाली उतरण्यास सांगितले. याचा राग आल्याने संबंधित तरुण अचानक त्यांच्या अंगावर धावून गेला आणि चाकूसारख्या धारदार हत्याराने त्यांच्या मांडीवर वार केला. हल्ल्यानंतर आरोपी बसमधून उडी मारून पसार झाला.
या घटनेनंतर बसमधील प्रवाशांमध्ये घबराट पसरली. जखमी अवस्थेत भालेराव यांना तातडीने उपचारासाठी रुग्णालयात दाखल करण्यात आले. दरम्यान, या हल्ल्यामागे पूर्वीच्या वादातून कोणाचा तरी सहभाग असावा, असा संशयही भालेराव यांनी व्यक्त केला आहे.
या प्रकरणी बंडगार्डन पोलीस ठाणे येथे गुन्हा दाखल करण्यात आला असून आरोपीचा शोध सुरू आहे. या घटनेचा तपास गणेश चव्हाण करीत आहेत.
