पुणे: पुण्यातील वाकड परिसरात वाहतूक पोलिसाकडून खंडणी मागितल्याचा धक्कादायक प्रकार समोर आला आहे. दंड भरतानाचा व्हिडिओ काढून तो व्हायरल करण्याची धमकी देत 50 हजार रुपयांची मागणी करण्यात आली. ही घटना 15 एप्रिल रोजी सायंकाळी 5 वाजण्याच्या सुमारास भुजबळ चौक येथील वाकड वाहतूक शाखेत घडली.
या प्रकरणी संबंधित पोलीस कॉन्स्टेबलने वाकड पोलीस ठाणे येथे फिर्याद दिली आहे. त्यानुसार वरद मनोज चव्हाण (रा. विद्युत कॉलनी, कन्नड, संभाजीनगर) याला अटक करण्यात आली असून त्याच्या दोन साथीदारांविरोधात गुन्हा दाखल करण्यात आला आहे.
मिळालेल्या माहितीनुसार, फिर्यादी हे वाकड वाहतूक विभागात कार्यरत आहेत. आरोपी वरद चव्हाण याच्या दुचाकीवर 13 हजार रुपयांचा दंड प्रलंबित होता. वाहतूक पोलिसांनी त्याची दुचाकी पकडल्यानंतर त्याला किमान 1 हजार रुपये दंड भरण्यास सांगितले.
दरम्यान, दंड भरताना आरोपी आणि त्याच्या साथीदारांनी मोबाईलवर व्हिडिओ चित्रीकरण केले. त्यानंतर हा व्हिडिओ सोशल मीडियावर व्हायरल करण्याची धमकी देत त्यांनी पोलीस कर्मचाऱ्याकडे 50 हजार रुपये तसेच उर्वरित 13 हजार रुपयांचा दंड माफ करण्याची मागणी केली.
या प्रकारामुळे वाहतूक पोलिसांमध्येही खळबळ उडाली असून प्रकरण गंभीर मानले जात आहे. सध्या वाकड पोलीस या प्रकरणाचा अधिक तपास करत आहेत.
