दौंड, ता. 06 (Daund News) : राहत्या घरात नायलॉनदोरीच्या सहाय्याने एका 28 वर्षीय तरुणाने गळफास घेऊन आत्महत्या केल्याची घटना सोमवारी (ता. 06) सकाळी नऊ वाजण्याच्या सुमारास उघडकीस आली आहे. ही घटना राहू (ता. दौंड)(Daund rahu Suicide) नजीक आदर्श नगर-कुलमळा येथे घडली. विशाल नारायण कुल (वय-28) असे आत्महत्या केलेल्या तरुणाचे नाव आहे. यासंदर्भात विशालचे चुलते नवनाथ जयवंत कुल यांनी यवत पोलिसांना खबर दिली.
यवत पोलिसांनी दिलेल्या माहितीनुसार, विशाल याने घरात गळफास घेतला असल्याची माहिती पोलिसांना दिली होती. पोलिस आल्यानंतर त्याच्या गळ्यातला दोर सोडून त्याला जमिनीवर झोपवले. दरम्यान विशालला तातडीने पुढील उपचारासाठी यवत येथील ग्रामीण रुग्णालयात दाखल करण्यात आले. मात्र उपचारादरम्यान त्याचा मृत्यू झाल्याचे डॉक्टरांनी घोषित केले. त्याने का आत्महत्या केली याचे कारण अद्याप अस्पष्ट आहे.
दोन महिन्यात दोन आत्महत्या
घरात कोणीही नसताना दोरीच्या सहाय्याने प्रणाली मधुकर नवले (वय-19) या तरुणीने 8 ऑगस्टला आत्महत्या केली होती. राहू (ता. दौंड) ग्रामपंचायत हद्दीतील सोनवणे मळा परिसरात हि घटना घडली होती. तर विशाल नारायण कुल (वय-28) या तरुणाने आज सोमवारी (ता. 06) राहत्या घरात गळफास घेतला. दोन महिन्यात दोघांनी आत्महत्या केल्याने परिसरात हळहळ व्यक्त केली जात आहे. या दोघांच्याही आत्महत्याचे कारण अद्याप अस्पष्ट आहे.
