फ्रान्स : फ्रान्समध्ये वाढती महागाई, शिक्षण क्षेत्रातील खर्चात झालेली कपात आणि सरकारी धोरणांच्या निषेधार्थ देशभरात उग्र आंदोलने उसळली आहेत. लाखो नागरिक रस्त्यावर उतरले असून निदर्शकांचा एकूण आकडा 4 लाखांच्या वर पोहोचला आहे. या देशव्यापी आंदोलनामुळे राजकीय वातावरण तापले असून राष्ट्राध्यक्ष इमॅन्युएल मॅक्रॉन यांच्या सरकारवरील दबाव वाढला आहे.
आंदोलकांना रोखण्यासाठी फ्रान्सच्या गृह मंत्रालयाने देशभरात 70,000 हून अधिक सुरक्षा कर्मचाऱ्यांना तैनात केले होते. संवेदनशील भागांत सुरक्षा कडक करण्यात आली असून काही मार्गांवर रॅलींवर निर्बंध लादण्यात आले होते. यादरम्यान पोलिसांनी देशभारतून सुमारे 1000 जणांना ताब्यात घेतले असून त्यांच्यावर मालमत्तेचे नुकसान, शस्त्रे बाळगणे आणि बेकायदेशीर जमाव जमवणे यांसारखे आरोप ठेवण्यात आले आहेत.
राजधानी पॅरिसमधील ‘पोर्ट डी व्हिन्सेन्स’जवळ मोठी गर्दी जमली असून काही मुखवटेधारी निदर्शकांनी पोलिसांच्या दिशेने दगड, बाटल्या आणि फटाके फेकले आहेत . परिस्थिती नियंत्रणाबाहेर जात असल्याचे पाहून पोलिसांनी अश्रूधुराचा मारा केला, वॉटर कॅननचा वापर केला आणि स्टन ग्रेनेड्स फेकले. पॅरिससोबतच ल्योन, मार्सेई आणि रेनेस या प्रमुख शहरांमध्येही संघर्ष, जाळपोळ आणि सार्वजनिक मालमत्तेचे नुकसान झाल्याचे समोर आले आहे. या हिंसक संघर्षात काही जण जखमी झाले आहेत.
कामगार संघटना, विद्यार्थी गट आणि डाव्या विचारसरणीच्या राजकीय पक्षांनी एकत्र येत हा तीव्र विरोध दर्शवला आहे. आंदोलकांच्या प्रमुख मागण्यांमध्ये शिक्षण क्षेत्रावरील खर्च वाढवणे, सार्वजनिक घरांच्या भाड्यातील वाढ रोखणे, नागरिकांना मासिक आर्थिक मदत देणे आणि नवीन सुरक्षा उपाययोजना मागे घेणे यांचा समावेश आहे. दैनंदिन गरजेच्या वस्तूंच्या वाढलेल्या किमतींमुळे सर्वसामान्यांचे घरगुती बजेट बिघडले असून, सरकारने तातडीने आर्थिक दिलासा द्यावा, अशी मागणी केली जात आहे.
आंदोलकांनी संप सुरूच ठेवण्याचे आवाहन केल्यामुळे आगामी काळात प्रशासनासमोर कायदा व सुव्यवस्था राखण्याचे मोठे आव्हान असणार आहे.
