पुणे : पुण्यात दिवसेंदिवस घरगुती हिंसेच्या घटनांमध्ये वाढ होत असतानाच आणखी एक धक्कादायक प्रकरण समोर आलं (Pune Crime) आहे. एका 24 वर्षीय तरुणाने आपल्या आई-वडिलांना लोखंडी सळईने मारहाण केल्याप्रकरणी पोलिसात गुन्हा दाखल झाला आहे. या घटनेने परिसरात खळबळ उडाली असून, यावर संताप व्यक्त केला जात आहे.
ही घटना चिखली परिसरातील आहे. घरात राहण्याच्या किरकोळ कारणावरून 24 वर्षीय तरुणाने आपल्या आई-वडिलांना शिवीगाळ करत मारहाण केली आहे. एवढेच नाही, तर त्याने वडिलांना लोखंडी सळईने मारून त्यांचा हात फ्रॅक्चर केला.
पोलिसांनी या घटनेबाबत दिलेल्या माहितीनुसार, ‘आरोपी मुलाने घरात राहण्याच्या कारणावरून फिर्यादी वडील आणि त्यांच्या आईला शिवीगाळ करत दमदाटी केली आणि हाताने मारहाण व धक्काबुक्की करत सदनिकेच्या गॅलरीमध्ये असलेली लोखंडाची सळई घेऊन वडिलांच्या उजव्या हातावर मारून हात फ्रॅक्चर केला. यानंतर वृद्ध आई-वडिलांनी पोलिसात मुलाविरोधात तक्रार दिली. प्राप्त तक्रारीनंतर पोलिसांनी पुढील तपास सुरु केला आहे.
