दौंड, ता. 02: पुणे–सोलापूर (Daund News) महामार्गावरील कुरकुंभ परिसरात महिंद्रा पिकअप व ट्रॅक्टरचा झालेल्या अपघातात ट्रॅक्टर चालकाचा जागीच मृत्यू झाला आहे. अपघात एवढा भीषण होता की, यामध्ये ट्रॅक्टरच्या पुढील भागाचे दोन तुकडे झाले होते. याप्रकरणी अज्ञात पिकअप चालकाविरुद्ध दौंड पोलीस ठाण्यात गुन्हा दाखल करण्यात आला आहे. मंगळवारी (ता. 02) दुपारी दोन वाजण्याच्या सुमारास कुरकुंभ (ता.दौंड) गावच्या हद्दीत पाटस बाजूकडुन कुरकुंभ बाजूकडे सर्विस रोड हा अपघात झाला.
संतोष बाबूराव वाघमोडे (वय-36, रा. रा.मलठण ता. दौंड) असे अपघातात मृत्यू झालेल्या ट्रॅक्टर चालकाचे नाव आहे. याप्रकरणी त्यांचे बंधू बापुराव बाबूराव वाघमोडे (वय-38) यांनी दौंड पोलीस ठाण्यात फिर्याद दिली आहे. त्यानुसार अज्ञात चालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, संतोष वाघमोडे हे ट्रॅक्टर चालक असून मंगळवारी पाटस बाजूकडुन कुरकुंभ बाजूकडे सर्विस रोडने दुपारी दोन वाजण्याच्या सुमारास दोन खाली ट्राँलीसह निघाले होते. जात असताना पाटस बाजुकडून येणारे महिंद्रा कंपनीची पिकअप गाडी (MH 42 M 5752) या गाडीवरील अज्ञात चालकाने गाडी भरधाव वेगात चालवून वाहतुकीच्या नियमनाकडे दुर्लक्ष करून ट्रक्टरच्या पुढील बाजूला जोराची धडक दिली.
या अपघातात ट्रक्टरच्या समोरच्या भागाचे दोन तुकडे झाले. यामध्ये संतोष वाघमोडे हे गंभीर व किरकोळ दुखापत झाले होते. त्यांना तात्काळ उपचारासाठी उपजिल्हा रूग्णालय, दौंड येथे घेऊन गेले असता उपचारापूर्वीच त्यांचे निधन झाले असल्याची माहिती वैद्यकीय अधिकाऱ्यानी दिली.
दरम्यान, याप्रकरणी अज्ञात चालकाविरूध्द दौंड पोलिस ठाण्यात भा.न्या.संहिता कलम 106(1),281,125a,125b,324(4),मो.वा.का 184,134/177 नुसार गुन्हा दाखल करण्यात आला आहे. पुढील तपास पोलीस हवालदार पठाण करीत आहेत.
