पुणे: पुण्यातील कुख्यात निलेश घायवळ (Nilesh Ghaywal) टोळीतील सदस्य अजय सरोदे (Pune Crime) याला कोथरूड पोलिसांनी अटक केली असून त्याच्याकडील परवानाधारक पिस्तुलातून त्याने तब्बल 200 राऊंड फायर केल्याचे समोर आले आहे. लोणावळ्यातील एका फॉर्म हाऊसवर आणि सोनई गावातील शेतात त्याने सराव म्हणून गोळीबार केला होता. या प्रकरणाचा कोथरूड पोलीस तपास करत आहेत.
सुमारे तीन महिन्यांपूर्वी कोथरूडमध्ये घायवळ टोळीच्या सदस्यांनी एका व्यक्तीवर गोळीबार केला होता. त्या घटनेनंतर काही मिनिटांतच टोळक्याने रस्त्यावर थांबलेल्या दुसऱ्या व्यक्तीवर प्राणघातक हल्ला केला. या मारहाणीत अजय सरोदे सहभागी असल्याचे तपासात स्पष्ट झाले. घटनांनंतर तो सतत फरार होता.
कोथरूड पोलिसांनी काही दिवसांच्या पाठपुराव्यानंतर त्याला अखेर ताब्यात घेतले. चौकशीदरम्यान सरोदे याच्याकडे परवानाधारक पिस्तुल असल्याचे समोर आले. जानेवारी 2024 मध्ये त्याला शस्त्राचा परवाना देण्यात आला होता. परवाना मिळाल्यानंतर त्याने सुमारे 400 काडतुसे खरेदी केली होती, त्यापैकी 200 काडतुसे त्याने सरावात फायर केली.
सरोदेनं परवान्याचा गैरवापर करून शस्त्र वापरण्याचा सराव केला असल्याने पोलीस दस्तऐवजांची तपासणी करत आहेत. त्याला शस्त्र परवाना देताना कोणती कागदपत्रे आणि माहिती सादर केली होती, याचीही पडताळणी सुरू आहे. परवाना असलेल्या शस्त्राचा अशा प्रकारे मोठ्या प्रमाणावर वापर ही गंभीर बाब मानली जात असून पोलिसांनी स्वतंत्र चौकशी सुरू केली आहे.
या घटनेमुळे पुन्हा एकदा घायवळ टोळी आणि त्यांच्या गुन्हेगारी हालचालींबाबत चिंता व्यक्त केली जात आहे. पोलिसांकडून टोळीच्या इतर सदस्यांची माहिती गोळा करण्यासाठी पुढील तपास सुरू आहे.
