गणेश सुळ
दौंड: दौंड (Daund Crime News) तालुक्यातील देलवडी आणि नाथचीवाडी परिसरात घरफोड्यांच्या मालिकेमुळे नागरिकांची झोप उडाली आहे. एकामागून एक अनेक चोरीच्या घटना परिसरात घडत असल्याने नागरिकांमध्ये भीतीचे वातावरण पसरले आहे.
चोरट्यांनी देलवडी आणि नाथचीवाडी परिसरात 8 ऑक्टोबरला मध्यरात्री दीड वाजण्याच्या सुमारास घरफोडीचे प्रयत्न केले. मात्र, नागरिकांनी दाखवलेली जागरूकता व घरातील सदस्यांनी केलेली तातडीची हालचाल यामुळे सर्व प्रयत्न अयशस्वी ठरले. मात्र त्याच वेळी सुरेश भालेराव यांच्या कपड्यामधील तीन हजार रुपये चोरून चोरटे पसार झाले.
त्याच वेळी, शेजारी राहणारे काका गायकवाड यांनी आपल्या घराचे दार वाजत असल्याने अर्धवट कोयंडा उघडला त्यावेळी अज्ञात चोरट्यांनी त्यांच्या हातावर चाकूने वार केला. यावेळी त्यांना 5 व्यक्ती घराबाहेर असल्याचे आढळून आले. रोड लगत असणाऱ्या पायल हॉटेलच्या सीसीटीव्ही कॅमेऱ्यात चोराच्या तीन गाड्या गेल्याचे कैद झाले असून परिसरात तणावाचे वातावरण निर्माण झाले आहे. तर याच गावातील कऱ्हे वस्तीतील रहिवासी दत्तात्रय कऱ्हे, यांच्या घरी देखील मध्यरात्रीच्या सुमारास चोरी झाल्याचे समोर आले आहे. बंद घराचा कोयंडा उचकटून कपाटातील बारा हजार रुपये व उशाला ठेवलेला मोबाईल चोरट्यांनी चोरून नेला.
याच दरम्यान नाथचीवाडी येथील इरिगेशन ऑफिसवरून मोटरसायकल चोरी झाल्याची घटना घडली आहे. एकाच दिवशी फक्त दोन किलोमीटर अंतरावर तीन ठिकाणी चोरी व चोरीचा प्रयत्न झाल्याची घटना घडली असल्याने परिसरातील नागरिकांमध्ये भीतीचे वातावरण निर्माण झाले आहे. पोलिसांनी ग्रामीण भागात गस्त वाढवावी असे स्थानिकांचे म्हणणे आहे.
