दौंड, (पुणे) : विवाह सोहळ्यात गर्दीचा फायदा घेत नवरिचे दागिने आणि वऱ्हाडी मंडळीच्या खिशातील पैशांची पाकिटे चोरणाऱ्या तीन परप्रांतीय चोरट्यांना दौंड पोलिसांनी अटक केली आहे. यामध्ये एका महिलेचा समावेश असून यातील आणखी दोन आरोपी पळून गेल्याची माहिती दौंडचे वरिष्ठ पोलीस निरीक्षक चंद्रशेखर यादव यांनी दिली.
राज रामनारायण सिसोदिया (वय-२७), बलभीम माकड सिसोदिया (वय-१९), शब्बोबाई प्रतापसिंग सिसोदिया (वय-५०) सर्व (रा. गुलखेड ता. राजगड मध्यप्रदेश) अशी अटक करण्यात आलेल्या आरोपींची नावे आहेत. तर राहुल रामनारायण सिसोदिया व दिनेशराजे सिसोदिया (रा.रायगड मध्यप्रदेश) अशी पळून गेलेल्या आरोपींची नावे आहेत.
पोलिसांनी दिलेल्या माहितीनुसार, मंगळवारी (ता. २७) पवार पॅलेस काष्टी रस्त्यालगत एक विवाहसोहळा सुरु असताना निलेश पवार रा. सोनवडी ता. दौंड यांना काही संशयित हे गर्दीचा फायदा घेत चोरीच्या उद्देशाने फिरत असल्याबाबत लक्षात आले. त्यांनी तात्काळ दौंड पोलिसांना माहिती कळविली. दौंड पोलिसांनी तत्काळ पवार पॅलेस मंगल कार्यालय गाठले आणि कार्यालयातील निलेश पवार आणि नागरिकांच्या मदतीने दोन इसमांना आणि एका महिलेला शिताफीने ताब्यात घेतले.
पोलिसांनी दोघांची अंगझडती घेतली असता त्यांनी जबरदस्ती चोरी केलेले पाकीट त्यामध्ये ६ हजार ५०० हे राज सिसोदिया याच्याजवळ मिळून आले. पोलिसांनी सखोल चौकशी केली असता त्यांनी राहुल सिसोदिया व दिनेशराजे सिसोदिया (रा.रायगड मध्यप्रदेश) हे देखील असल्याचे सांगितले. दरम्यान, आरोपीवर गुन्हा दाखल करण्यात आला असून अटक केली आहे. आरोपींना न्यायालयात हजर केले असता त्यांना दोन दिवसाची पोलीस कोठडी सुनावण्यात आली आहे. तपास दौंड पोलीस करीत आहेत.
