पुणे: पुण्यातील गुलटेकडी परिसरात चोरट्यांनी एका रहिवासी सोसायटीच्या मुख्य प्रवेशद्वारावरच सुरक्षारक्षकाच्या हातातील पैशांची बॅग हिसकावून नेल्याची धक्कादायक घटना समोर आली आहे. गुरुवारी रात्री घडलेल्या या प्रकारामुळे परिसरात खळबळ उडाली असून, स्वारगेट पोलीस या प्रकरणाचा सखोल तपास करत आहेत.
या घटनेतील तक्रारदार हे ६९ वर्षीय व्यावसायिक असून, ते गुलटेकडी येथील ‘हर्ष रेसिडेन्सी’मध्ये राहतात. सॅनिटरी साहित्याचा त्यांचा मोठा व्यवसाय आहे. रोजच्या विक्रीतून जमा झालेली मोठी रक्कम ते दररोज रात्री बॅगेत घेऊन घरी येत असत. सुरक्षेसाठी ते सोसायटीच्या गेटवर पोहोचल्यावर तिथला सुरक्षारक्षक ती बॅग स्वतःच्या हातात घ्यायचा आणि त्यांना इमारतीपर्यंत सोबत सोडायला जायचा. गुन्हेगारांनी तक्रारदारांच्या या रोजच्या नित्यक्रमावर आणि हालचालींवर गेल्या काही दिवसांपासून बारीक नजर ठेवली होती, असे दिसते.
गुरुवारी रात्रीच्या वेळी तक्रारदार ६,५०,००० रुपयांची रोकड आणि २ मोबाईल असलेली बॅग घेऊन सोसायटीच्या गेटवर आले. नेहमीप्रमाणे सुरक्षारक्षकाने ती बॅग आपल्या हातात घेतली. तक्रारदार लिफ्टकडे जाण्यासाठी काही पावले पुढे गेले, नेमकी हीच संधी साधून गेटजवळ दबा धरून बसलेल्या अज्ञात चोरट्याने सुरक्षारक्षकावर अचानक झडप घातली. क्षणार्धात बॅग हिसकावून चोरट्याने अंधाराचा फायदा घेतला आणि तिथून पळ काढला. पोलिसात तक्रार दाखल केली असता आता पोलीस परिसरातील सीसीटीव्ही कॅमेऱ्यांचे फुटेज तपासून चोराचा माग काढत आहेत.
