सागर जगदाळे
भिगवण: भिगवण व परिसरातील चहाप्रेमींना आता चहासाठी अधिक पैसे मोजावे लागणार आहेत. स्थानिक चहा व्यावसायिकांनी एकत्र येऊन घेतलेल्या निर्णयानुसार, चहाचा दर 10 रुपयांवरून वाढवून 15 रुपये करण्यात आला आहे. काल झालेल्या बैठकीत हा निर्णय घेण्यात आला असून, अनेक हॉटेल्स आणि टपऱ्यांवर याची अंमलबजावणी सुरू झाली आहे.
वाढत्या महागाईच्या पार्श्वभूमीवर चहा बनवण्यासाठी लागणाऱ्या कच्च्या मालाच्या किमतीत मोठी वाढ झाली आहे. चहा पावडर, साखर, दूध तसेच गॅसच्या दरात सातत्याने वाढ होत असल्याने जुन्या दरात व्यवसाय करणे कठीण होत असल्याचे व्यावसायिकांचे म्हणणे आहे. याशिवाय वीज बिल, दुकान भाडे व कामगार खर्च वाढल्याने ही दरवाढ अपरिहार्य ठरल्याचेही त्यांनी सांगितले.
दरम्यान, अनेक चहा विक्रेत्यांनी सोशल मीडियाच्या माध्यमातून नवीन दर जाहीर केले आहेत. काही ठिकाणी चहा, कॉफी व दूध 15 रुपये, तर सरगम 25 रुपये दराने विक्री होत असल्याचे दिसून येत आहे. “हाफ चहा” किंवा “हाफ सरगम” उपलब्ध नसल्याच्या सूचनाही काही ठिकाणी देण्यात आल्या आहेत.
“दुकानात येणाऱ्या ग्राहकांसाठी पूर्वी सहजपणे चहापाणी करण्याची प्रथा होती; मात्र दरवाढ झाल्याने आता त्यात काही प्रमाणात बदल करावा लागणार आहे. वाढलेल्या दरांमुळे हा खर्च व्यावसायिकांसाठी थोडा जड ठरत आहे.”
अक्षय वाघ (ओम गिफ्ट शॉपी, भिगवण)
एकूणच, महागाईच्या वाढत्या दबावामुळे घेतलेल्या या निर्णयाचा परिणाम ग्राहक आणि लहान व्यावसायिक दोघांवरही होत असून, भिगवणमध्ये चहाचा कप आता महाग झाला आहे.
