जळगाव: जळगाव (Crime News) जिल्ह्यातील मुक्ताईनगर येथे हृदय पिळवटून टाकणारी घटना घडली आहे. एकाच मुलीवर प्रेम असल्याने दोन मित्रांमध्ये झालेल्या भांडणातून एका तरुणाने दुसऱ्या मित्राची निर्घृण हत्या केली आहे. या घटनेनंतर पोलिसांनी त्वरीत कारवाई करत 2 आरोपींना अटक केली आहे.
हत्या करण्यात आलेल्या तरुणाचे नाव विशाल गोसावी (वय 24 वर्षे) आहे. मुक्ताईनगर पोलीस ठाण्यात काल विशाल बेपत्ता झाल्याची तक्रार कुटुंबीयांनी नोंदवली होती. मुक्ताईनगरचे डीवायएसपी सुभाष ढवळे यांनी दिलेल्या माहितीनुसार, चौकशीदरम्यान विशाल बेपत्ता होण्यापूर्वी त्याचा मित्र ऋषीकेश धनगर याच्यासोबत होता, अशी माहिती पोलिसांना मिळाली.
या माहितीच्या आधारे पोलिसांनी ऋषीकेशला ताब्यात घेऊन कसून चौकशी केली. चौकशीदरम्यान ऋषीकेशने आपल्या लहान भावाच्या, म्हणजेच आकाश धनगरच्या मदतीने विशालला संपवल्याची धक्कादायक कबुली दिली. त्यानंतर पोलिसांनी दोन्ही आरोपींना अटक केली. हत्येसाठी वापरण्यात आलेली कारही पोलिसांनी जप्त केली आहे.
पोलिसांच्या प्राथमिक तपासात असे समोर आले आहे की, घटनेच्या दिवशी विशाल, ऋषीकेश आणि आकाश हे तिघेही हनुमान मंदिराचे दर्शन घेऊन आले होते. यानंतर तिघेही दारू पार्टीसाठी बसले. दारूच्या नशेत असताना, एकाच मुलीवरील प्रेमावरून त्यांच्यात वाद सुरू झाला. हा वाद इतका वाढला की, ऋषीकेशने भावाच्या मदतीने धारदार चाकूने भोसकून विशालची हत्या केली. सध्या पोलिस या प्रकरणाचा अधिक तपास करत आहेत.
