Crime News : कशाळ भोयरे परिसरात राहणारा एक व्यक्ती पहाटे पाच वाजल्यापासून अचानक बेपत्ता झाल्याची घटना समोर आली होती. त्यानंतर काही वेळातच त्या व्यक्तीची वॅगनआर कार इंद्रायणी नदीकाठी टाकवे येथे बेवारस अवस्थेत आढळून आल्याने परिसरात एकच खळबळ उडाली होती. अखेर आज सकाळी राबवलेल्या शोध मोहिमेत त्या व्यक्तीचा मृतदेह नदीपात्रात सापडला आहे. (Crime News)
नेमकं काय घडलं होतं?
सदर व्यक्ती बेपत्ता झाल्याची माहिती मिळताच पोलीस आणि नातेवाईकांकडून शोध सुरू करण्यात आला. दरम्यान, त्यांची गाडी थेट नदीकाठी सापडल्याने घातपाताची शक्यताही व्यक्त केली जात होती. वडगाव पोलीस स्टेशनचे वायाळ साहेब यांनी लोणावळ्यातील शिवदुर्ग मित्र मंडळाचे सचिव सुनील गायकवाड यांच्याशी संपर्क साधत मदतीची विनंती केली. मात्र रात्र झाल्याने शोधमोहीम सकाळी सुरू करण्याचा निर्णय घेण्यात आला.
२० मिनिटांत लागला मृतदेहाचा ठाव
आज सकाळी दहा वाजण्याच्या सुमारास शिवदुर्ग मित्र मंडळ आणि वन्यजीव रक्षक टीम घटनास्थळी दाखल झाली. पुलाच्या आसपास नदीपात्रात शोध सुरू असतानाच अवघ्या २० मिनिटांत त्या व्यक्तीचा मृतदेह आढळून आला. त्यानंतर टीमने मृतदेह पाण्याबाहेर काढून पोलीस हवालदार देशमुख यांच्या ताब्यात दिला.
या शोध मोहिमेत शिवदुर्ग मित्र मंडळाचे अनिल आंद्रे, महेश मसणे, प्रमोद ओव्हाळ, निलेश गराडे, गणेश गायकवाड, विनय सावंत, सतीश आहेर आणि योगेश दळवी यांनी सक्रिय सहभाग घेतला. या घटनेमुळे संपूर्ण परिसरात शोककळा पसरली असून पुढील तपास पोलीस करत आहेत.
