PMC Election : राज्यात महानगरपालिका निवडणुकांचे वारे वाहू लागले असून पुण्यात राजकारण चांगलंच तापलं आहे. पुणे आणि पिंपरी-चिंचवडमधील अनेक माजी नगरसेवकांनी थेट भाजपमध्ये प्रवेश केल्याने सगळ्याच समीकरणांना नवं वळण मिळालं आहे. याच पार्श्वभूमीवर पुण्यातील प्रभाग क्रमांक ३२ म्हणजेच वारजे-माळवाडी परिसर सध्या चांगलाच चर्चेत आला आहे. इथे सध्या निवडणुकीची सारी गणितं ‘भिसे’ कुटुंबाभोवती फिरताना दिसत आहेत. (PMC Election)
भाजपमध्ये गर्दी, तिकिटासाठी चुरस
प्रभाग ३२ मध्ये राष्ट्रवादी काँग्रेसचे माजी नगरसेवक भाजपमध्ये आल्याने पक्षात इच्छुकांची संख्या अचानक वाढली आहे. जुने निष्ठावंत आणि नव्याने आलेले नेते यांच्यात तिकिटासाठी जोरदार चढाओढ सुरू आहे. त्यामुळे अनेक इच्छुकांची नावं कात्रीत जाण्याची शक्यता बोलली जात आहे. अशा परिस्थितीतही अनुसूचित जाती प्रवर्गातून प्रियांका भिसे यांचं नाव भाजपच्या उमेदवारीसाठी आघाडीवर असल्याची चर्चा आहे.
इतर पक्षांकडूनही डोळा
प्रियांका भिसे यांची प्रभागातली पकड आणि गेल्या काही काळातली त्यांची सक्रियता पाहता इतर पक्षही त्यांच्याकडे लक्ष देत आहेत. प्रभाग ३२ मध्ये अनुसूचित जाती प्रवर्गातून ताकदीची महिला उमेदवारांची वानवा असल्याने, काही विरोधी पक्षांकडून त्यांना थेट उमेदवारीच्या ऑफर आल्याची चर्चा राजकीय वर्तुळात सुरू आहे.
‘तनिष्का भिसे’ प्रकरणातून मिळालेली सहानुभूती
काही काळापूर्वी गाजलेल्या ‘तनिष्का भिसे’ प्रकरणात प्रियांका भिसे यांनी घेतलेली आक्रमक भूमिका नागरिकांच्या पसंतीस उतरली होती. व्यवस्थेविरुद्ध उभा राहून त्यांनी सामान्यांसाठी आवाज उठवला, यामुळे त्यांच्या बाजूने मोठी सहानुभूती तयार झाली आहे. हीच सहानुभूती पुढे मतांमध्ये रुपांतरीत होऊ शकते, असा अंदाज राजकीय जाणकार व्यक्त करत आहेत.
तापकीर-दोडके वादाची चर्चा
दरम्यान, आमदार भीमराव तापकीर यांचे कट्टर विरोधक मानले जाणारे सचिन दोडके भाजपमध्ये दाखल झाल्याने पक्षातील अंतर्गत वाद उघड झाला आहे. दोडकेंच्या प्रवेशामुळे आमदार तापकीर नाराज असल्याची चर्चा असून, याचा परिणाम प्रभाग ३२ मधील उमेदवारी ठरवताना होणार का, याकडे सगळ्यांचं लक्ष लागलं आहे.
एकंदरीत, प्रभाग ३२ मध्ये तिकीट कोणाच्या पदरात पडतं आणि प्रियांका भिसे नेमक्या कोणत्या पक्षाच्या आणि कोणत्या चिन्हावर निवडणूक लढवतात, हे पाहणं आता खूपच रंजक ठरणार आहे.
