आदित्य बोराटे
इंदापूर : उपमुख्यमंत्री सुनेत्रा पवार यांच्याबाबत काँग्रेस पक्षाच्या अधिकृत ‘एक्स’ खात्यावरून करण्यात आलेल्या कथित आक्षेपार्ह पोस्टचा निषेध करत इंदापूर तालुका राष्ट्रवादी काँग्रेस पक्षाच्या वतीने शुक्रवारी (दि.७) नायब तहसीलदार राऊत मॅडम व इंदापूर पोलिस ठाण्याचे पोलिस निरीक्षक विलास नाळे यांना निवेदन देण्यात आले. तसेच संबंधित ‘एक्स’ खाते तातडीने बंद करून जबाबदार व्यक्तींवर कायदेशीर कारवाई करण्यात यावी, अशी मागणी निवेदनाद्वारे करण्यात आली आहे.
तालुकाध्यक्ष हनुमंत कोकाटे यांच्या नेतृत्वाखाली देण्यात आलेल्या निवेदनानुसार, उपमुख्यमंत्री सुनेत्रा पवार यांच्याबाबत करण्यात आलेले वक्तव्य महिलांचा अवमान करणारे, बेजबाबदार आणि निषेधार्ह असल्याचा आरोप करण्यात आला आहे. महाराष्ट्राची परंपरा महिलांचा सन्मान करणारी असून राजकीय मतभेद असले तरी महिलांबाबत अवमानकारक भाषा स्वीकारार्ह नसल्याचे निवेदनात नमूद करण्यात आले आहे.
तसेच, काँग्रेसचे प्रदेशाध्यक्ष हर्षवर्धन सपकाळ यांनी सार्वजनिक माफी मागावी, संबंधित ‘एक्स’ खाते तातडीने बंद करण्यात यावे आणि संबंधितांवर कायदेशीर कारवाई करण्यात यावी, अशी मागणीही निवेदनातून करण्यात आली आहे.
यावेळी राष्ट्रवादी काँग्रेसच्या पदाधिकारी व कार्यकर्त्यांनी या घटनेचा तीव्र निषेध व्यक्त केला.या निवेदनावर तालुकाध्यक्ष हनुमंत कोकाटे, नगराध्यक्ष भरत शहा, उपनगराध्यक्ष बाळासाहेब ढवळे, श्रीमंत ढोले (सर),डॉ.शशिकांत तरंगे, अतुल झगडे,प्रताप पाटील यांच्यासह पक्षाच्या पदाधिकाऱ्यांच्या स्वाक्षऱ्या आहेत.
