पुणे : राज्याचे उपमुख्यमंत्री एकनाथ शिंदे यांनी पंतप्रधान नरेंद्र मोदी यांची पंतप्रधान कार्यालयात आज भेट घेतली. या दोन नेत्यांमध्ये सुमारे एक तास चाललेल्या या बैठकीत महाराष्ट्रातील प्रलंबित प्रकल्प आणि महत्त्वाकांक्षी विकासकामांवर सविस्तर चर्चा झाली. या बैठकीमुळे राजकीय क्षेत्रात विविध चर्चांना उधाण आले आहे.
या भेटीदरम्यान पंतप्रधान मोदी यांनी एनडीएच्या नवनिर्वाचित खासदारांशी, विशेषतः राष्ट्रवादी काँग्रेस आणि शिवसेना (ठाकरे गट) मधून आलेल्या लोकप्रतिनिधींशी संवाद साधला. खासदारांना संसदीय कामकाज व राज्याच्या विकासावर लक्ष केंद्रित करण्याचा सल्ला देताना पंतप्रधान म्हणाले, “देशातील प्रत्येक राज्य प्रगत झाल्यावरच भारताचा वेगवान विकास शक्य आहे. त्यामुळे आपापल्या भागाच्या प्रगतीसाठी पूर्ण ताकदीने काम करा.”
भारताच्या अर्थव्यवस्थेकडे आज संपूर्ण जगाचे लक्ष लागून राहिले असून लोकप्रतिनिधींवर मोठी जबाबदारी आहे, असे प्रतिपादन त्यांनी केले. पूर्व भारताच्या विकासाचे महत्त्व अधोरेखित करताना ते म्हणाले, “महाराष्ट्र हे आधीपासून समृद्ध आहे, परंतु एकेकाळी बंगाल आणि ओडिशा ही देशामधील सर्वाधिक विकसित राज्ये होती. भारताच्या सर्वांगीण प्रगतीसाठी या पूर्व राज्यांचा विकास होणे अत्यंत गरजेचे आहे.”
संसदेतील वर्तनाबाबत पंतप्रधानांनी लोकप्रतिनिधींना पुढील महत्त्वाच्या सूचना दिल्या.संसदेच्या कामकाजात रोज उपस्थित राहा आणि चर्चेमध्ये सक्रिय सहभागी व्हा.कोणत्याही विषयावर मांडणी करण्यापूर्वी सखोल अभ्यास करा; त्यासाठी ग्रंथालयाचा वापर करा.
भारताच्या समृद्ध संस्कृतीचा आणि संसदीय लोकशाहीच्या परंपरांचा अभ्यास करा.
लोकप्रतिनिधींनी राष्ट्रनिर्माणाच्या कार्यात पूर्ण विश्वासाने स्वतःला झोकून द्यावे, असे आवाहन शेवटी पंतप्रधानांनी केले.
