पोपट पाचंगे
रांजणगाव गणपती: दुष्काळाची तीव्रता लक्षात घेता नुकसान झालेल्या पिकांचे तातडीने पंचनामे करुन शासनाकडे अहवाल सादर करावा, नुकसानग्रस्त शेतकरी मदतीपासून वंचित राहू नये, याची काळजी घेण्याच्या सूचना माजी गृहमंत्री दिलीप वळसे पाटील यांनी अधिकाऱ्यांना दिल्या.
शिरुर तालुक्यातील चिंचोली मोराची, कान्हूर मेसाई, धामारी व पाबळ येथे उद्धभवलेल्या दुष्काळी परिस्थितीची पाहणी करण्यासाठी माजी गृहमंत्री वळसे पाटील यांनी गावभेट करत उपस्थित शेतकरी व ग्रामस्थांशी संवाद साधला.शिरुर तालुक्यात दुष्काळ जाहीर झाला आहे,मात्र दुष्काळाची तीव्रता प्रत्यक्ष शेतशिवारात किती आहे, याची पाहणी करताना अनेक शेतकऱ्यांची पिके पाण्याअभावी करपल्याची व नुकसान झाल्याचे निदर्शनास आले.
या पाश्वभूमीवर सुरु असलेले पिकांचे पंचनामे कोणत्याही प्रकारे विलंब न करता तातडीने पूर्ण करण्याच्या सूचना माजी गृहमंत्री वळसे पाटील यांनी अधिकाऱ्यांना दिल्या.
यावेळी जिल्हा परिषदेचे उपाध्यक्ष विवेक वळसे पाटील,राष्ट्रवादी काँग्रेसचे अध्यक्ष मानसिंग पाचुंदकर पाटील,माजी सभापती प्रकाश पवार, राजेंद्र जासूद, बबन शिंदे, राजेश लांडे, बबन वाळके, प्रविण ढोकले,ज्ञानेश्वर खैरे, माजी सरपंच बंडू पुंडे,सुधीर पुंडे, भास्कर पुंडे, विमल नाणेकर, तालुका कृषि अधिकारी सुवर्णा आदक आदि उपस्थित होते.
दुष्काळामुळे नुकसान झाले, हे वास्तव आहे, मात्र शेतकऱ्यांनी हतबल होऊ नये, मी सरकारचा प्रतिनिधी या नात्याने ठामपणे तुमच्या मागे उभा आहे, या परिसरातील नुकसानग्रस्त शेतकऱ्यांना मदत तर मिळेलच याशिवाय दुष्काळाच्या सर्व सरकारी सवलती देखील लागू होतील, असे माजी गृहमंत्री दिलीप वळसे पाटील यांनी सांगितले.
