पुणे: PM किसान सन्मान निधी योजनेच्या २४व्या हप्त्याची देशभरातील कोट्यवधी शेतकरी आतुरतेने वाट पाहत आहेत. हा हप्ता ऑक्टोबर महिन्यात जमा होण्याची शक्यता व्यक्त केली जात आहे. त्यापूर्वी पीएम किसानच्या पोर्टलवर शेतकऱ्यांसाठी काही महत्त्वाच्या सुविधा उपलब्ध करून देण्यात आल्या आहेत. या सुविधांमुळे योजनेशी संबंधित काही कामे आता शेतकऱ्यांना घरबसल्या ऑनलाइन करता येणार आहेत. त्यामुळे हप्ता मिळण्यापूर्वी आपल्या नोंदणीतील माहिती तपासणे आणि आवश्यक अपडेट करणे महत्त्वाचे ठरणार आहे.
पीएम किसानच्या नोंदणीमध्ये काही माहिती अपूर्ण असल्यास ती पूर्ण करण्यासाठी आता कार्यालयात जाण्याची गरज नाही. पोर्टलवरील ‘Update Missing Information’ या पर्यायाचा वापर करून शेतकरी आपली अपूर्ण माहिती ऑनलाइन भरू शकतात. यासाठी आधार क्रमांक किंवा रजिस्ट्रेशन नंबर आणि कॅप्चा भरून संबंधित रेकॉर्ड शोधावा लागतो. त्यानंतर आवश्यक माहिती भरून ती ऑनलाइन सबमिट करता येते.
याशिवाय मोबाईल नंबर बदलला असल्यास तो पीएम किसानच्या नोंदणीत अपडेट करण्याची सुविधाही देण्यात आली आहे. ‘Update Mobile Number’ या पर्यायातून आधार क्रमांक किंवा रजिस्ट्रेशन नंबरच्या माध्यमातून नवीन मोबाईल नंबर नोंदवता येतो. आधारला जोडलेला मोबाईल नंबर बदलला असल्यास ही माहिती अपडेट करणे शेतकऱ्यांसाठी महत्त्वाचे आहे.
पात्र नसतानाही पीएम किसानचा लाभ मिळत असल्यास रक्कम परत करण्यासाठी ‘Online Refund’ पर्याय उपलब्ध आहे. रजिस्ट्रेशन किंवा आधार क्रमांक आणि कॅप्चा भरल्यानंतर OTPच्या माध्यमातून रक्कम परत करण्याची प्रक्रिया पूर्ण करता येते.
पीएम किसानशी संबंधित अडचणी असल्यास संबंधित अधिकाऱ्यांशी संपर्क साधण्याची सुविधाही पोर्टलवर देण्यात आली आहे. ‘Search your Point of Contact (POC)’, ‘State Nodal Contact Detail’ आणि ‘Search District Nodal’ या पर्यायांद्वारे राज्य किंवा जिल्हास्तरीय अधिकाऱ्यांचे नाव, फोन नंबर आणि ई-मेल मिळू शकतो. त्यामुळे २४व्या हप्त्यापूर्वी शेतकऱ्यांनी आपली नोंदणी आणि संपर्काची माहिती तपासून आवश्यक बदल करून ठेवणे फायदेशीर ठरणार आहे.
