पुणे : मराठा क्रांती मोर्चाच्या रेखा कोंडे यांनी पुण्यात पत्रकार परिषद घेत मनोज जरांगे पाटील यांच्यावर गंभीर आरोप केले. मनोज जरांगे पाटील यांच्याकडे सुमारे पाच हजार जणांची ट्रोलिंग करणारी टोळी असल्याचा दावा कोंडे यांनी केला. मराठा आरक्षणाच्या आंदोलनात सहभागी झालेल्या कार्यकर्त्यांना आणि प्रश्न विचारणाऱ्यांना अश्लील पद्धतीने ट्रोल करण्यात आल्याचा आरोपही त्यांनी केला.
५८ मोर्चांच्या माध्यमातून मराठा समाज मोठ्या संख्येने एकत्र आला होता आणि या आंदोलनाची देशभरात नोंद झाली होती. याच काळात मराठा आरक्षणाचा लढा पुढे आला. मात्र, मनोज जरांगे पाटील यांच्यासारखे अभ्यास नसलेले नेतृत्व एका लाठीचार्जनंतर पुढे आले, अशी टीका कोंडे यांनी केली. काही व्यक्तींना आंदोलनातून बाजूला करण्यात आले असून, आरक्षणाच्या लढ्यातून समाजाला अपेक्षित असे काही मिळालेले नाही, असा आरोप त्यांनी केला.
पाटोदा येथे झालेल्या ११व्या आंदोलनावेळी आपण जरांगे यांना एक प्रश्न विचारला होता. त्यानंतर पाच हजार लोकांकडून आपल्याला अश्लील पद्धतीने ट्रोल करण्यात आले, असा दावा कोंडे यांनी केला. ‘आम्ही अंधभक्तीची पट्टी डोळ्यांवर बांधली होती. वाशीमध्ये गुलाल उधळला, मात्र हातात काहीच मिळाले नाही. लोकांच्या विश्वासाची माती करण्यात आली,’ अशी टीकाही त्यांनी केली.
जरांगे यांच्या आंदोलनाच्या पार्श्वभूमीवर पडद्यामागे काही सेटिंग झाल्याचे आपण पाहिले असून, काही छुप्या चर्चा स्वतःच्या कानाने ऐकल्याचा दावा कोंडे यांनी केला. साथीदारांच्या लोकांच्या चौकशीची माहिती समोर आल्यानंतर आपल्याला काही बाबी समजल्याचेही त्यांनी सांगितले. आंदोलन पाचव्या दिवशी संपले नाही तर अटक झाली असती, असा सरकारकडून इशारा देण्यात आला होता, असाही गंभीर आरोप त्यांनी केला.
माता-भगिनींना ट्रोल करू नये, अशी अपेक्षा व्यक्त करत कोंडे यांनी गॅलेक्सी हॉस्पिटलसंदर्भातही आरोप केले. तेथील डॉक्टर मनोज जरांगे यांना हवे तसे रिपोर्ट देतात, असा दावा त्यांनी केला. तसेच ‘एकच गोधडी तीन वर्षे, गाड्या बदलल्या, भाषा बदलली; मग गोधडी का बदलली नाही?’ असा सवाल करत मराठा समाजानेही या बाबींचा विचार करायला हवा, असे रेखा कोंडे म्हणाल्या.
