पुणे : पुण्यात सुरू असलेल्या स्पर्धा परीक्षांच्या विद्यार्थ्यांच्या आंदोलनाची मुख्यमंत्री देवेंद्र फडणवीस यांनी दखल घेतली आहे. महाराष्ट्र लोकसेवा आयोगाच्या (MPSC) माजी आणि विद्यमान अध्यक्ष तसेच सदस्यांविरोधात संविधानाच्या कलम 317 नुसार कारवाई करण्यासाठी समिती गठीत करण्याची शिफारस मुख्यमंत्री देवेंद्र फडणवीस यांनी राज्यपाल जिष्णूदेव वर्मा यांच्याकडे केली आहे. या निर्णयामुळे विद्यार्थ्यांच्या आंदोलनाला महत्त्वपूर्ण वळण मिळण्याची शक्यता आहे.
मुख्यमंत्री फडणवीस यांनी राज्यपालांकडे सादर केलेल्या शिफारशीनुसार, उच्च न्यायालयाच्या निवृत्त न्यायाधीशांच्या अध्यक्षतेखाली समिती स्थापन करण्यात यावी. या समितीने तीन महिन्यांच्या कालावधीत आपला अहवाल सादर करावा आणि समितीच्या निष्कर्षांच्या आधारे पुढील कारवाई करण्यात यावी, अशी विनंती करण्यात आली आहे. MPSC मधील कारभार, निर्णयप्रक्रिया आणि अध्यक्ष व सदस्यांच्या भूमिकेबाबत विद्यार्थ्यांकडून उपस्थित करण्यात आलेल्या प्रश्नांच्या पार्श्वभूमीवर ही शिफारस करण्यात आली आहे.
पुण्यात स्पर्धा परीक्षांची तयारी करणारे विद्यार्थी विविध मागण्यांसाठी आंदोलन करत आहेत. या आंदोलनाच्या पार्श्वभूमीवर विद्यार्थ्यांच्या शिष्टमंडळाची मुख्यमंत्री देवेंद्र फडणवीस यांच्यासोबत चर्चा झाली होती. या चर्चेदरम्यान आयोगाच्या अध्यक्षांना थेट पदावरून हटवण्यापूर्वी त्यांच्याविरोधातील आरोपांची चौकशी करणे आवश्यक असल्याचे सांगण्यात आले होते.
त्यानुसार MPSC चे अध्यक्ष आणि सदस्य यांच्याविरोधात चौकशी करून आवश्यक ती कारवाई करण्यासाठी समिती स्थापन करण्यात यावी, अशी विनंती मुख्यमंत्री फडणवीस यांनी राज्यपालांकडे केली आहे. आता राज्यपालांकडून या शिफारशीवर काय निर्णय घेतला जातो, याकडे आंदोलन करणाऱ्या विद्यार्थ्यांसह स्पर्धा परीक्षांची तयारी करणाऱ्या उमेदवारांचे लक्ष लागले आहे.
