न्हावरे: दौंड व शिरूर तालुक्यांच्या सीमेलगत दौंड तालुक्यातील वाळकी,पिराचीवाडी आणि परिसरातील गावांच्या शेतजमिनींमधून जेसीबीच्या सहाय्याने मोठ्या प्रमाणावर मातीचा उपसा करून त्याची वाहतूक शिरूर तालुक्यातील रांजणगाव सांडस परिसरातील रस्त्यांवरून दररोज सुमारे ५० ते ६० हायवा-डंपरमधून होत असल्याचा आरोप स्थानिक ग्रामस्थांनी केला आहे.
या ओव्हरलोड वाहतूकीचा सर्वाधिक फटका रांजणगाव सांडस–नागरगाव फाटा रस्त्याला बसला आहे. रस्त्यावर मोठमोठे खड्डे पडले असून, रस्त्याच्या कडेला चर पडले आहेत. ओव्हरलोड वाहनांमुळे रस्त्यावर टाकलेली खडी बाजूला गेली असून, रस्त्याची अवस्था दिवसेंदिवस बिकट होत आहे.
रॉयल्टीच्या पावत्यांवरही संशयाची सावली
मोठ्या प्रमाणावर मातीची वाहतूक करणाऱ्या काही हायवा चालकांकडे डुप्लिकेट रॉयल्टीच्या पावत्या असल्याची चर्चा परिसरात सुरू आहे. त्यामुळे संबंधित वाहन चालकांकडे असलेल्या रॉयल्टी पावत्यांची महसूल विभागाने प्रत्यक्ष पडताळणी करावी, अशी मागणी ग्रामस्थांकडून होत आहे. कोणत्या ठिकाणची माती, किती प्रमाणात आणि कोणत्या परवानगीच्या आधारे वाहतूक केली जात आहे, याचीही शिरूर आणि दौंडच्या महसूल विभागाने एकत्रित तपासणी करावी अशी मागणी होत आहे.
विशेष म्हणजे, मोठ्या प्रमाणात वाहतूक सुरू असतानाही अनेक वाहनांकडे वैध रॉयल्टी पावत्या नसल्याचा आरोप शेतकरी व ग्रामस्थांनी केला आहे. त्यामुळे या संपूर्ण वाहतुकीची महसूल विभागाने सखोल चौकशी केल्यास वस्तुस्थिती समोर येण्याची शक्यता आहे. माती वाहून नेणाऱ्या वाहनांमुळे परिसरात मोठ्या प्रमाणात धुळीचे लोट उठत आहेत. सकाळ, दुपार आणि सायंकाळच्या वेळेत या मार्गावर मोठी वर्दळ असल्याने नागरिकांना धुळीचा त्रास सहन करावा लागत आहे. जिल्हा परिषद प्राथमिक शाळेच्या विद्यार्थ्यांनाही धुळीमुळे रस्त्यावरून चालणे कठीण झाले आहे.
दौंड-शिरूर सीमेवर संयुक्त पथकाची मागणी
अवैध माती उपसा व वाहतुकीला आळा घालण्यासाठी दौंड आणि शिरूर तालुक्यांच्या सीमेवर महसूल विभागाने संयुक्त पथक नेमून तातडीने कारवाई करावी, अशी जोरदार मागणी योगेश रणदिवे यांनी केली आहे. तसेच ओव्हरलोड वाहतुकीमुळे खराब झालेला रांजणगाव सांडस–नागरगाव फाटा रस्ता संबंधित मातीचोर अथवा जबाबदार घटकांकडून दुरुस्त करून घ्यावा, अशीही मागणी नागरिकांनी केली आहे.
दरम्यान, महसूल विभागाने या प्रकरणाची गांभीर्याने दखल घेऊन माती उपशाची परवानगी, रॉयल्टी पावत्या, पावत्यांची सत्यता, वाहतूक करणाऱ्या वाहनांची क्षमता आणि संबंधित ठिकाणचा माती उपसा यांची संयुक्त तपासणी करावी, अशी मागणी ग्रामस्थांमधून जोर धरत आहे.
वाहतूक शिरूर तालुक्यातील रांजणगाव सांडस गावातून होत असल्यामुळे न्हावऱ्याचे मंडलाधिकारी प्रशांत कांबळे यांच्याशी संपर्क साधला असता त्याच्याशी संपर्क होऊ शकला नाही.
