पनवेल: पनवेलमध्ये १० वर्षीय मुलीसोबत सार्वजनिक शौचालयात अश्लील कृत्य केल्याप्रकरणी २४ वर्षीय सफाई कर्मचाऱ्याला पनवेल शहर पोलिसांनी अटक केली आहे. आरोपीविरोधात पोक्सो कायद्यान्वये गुन्हा दाखल करण्यात आला असून, प्रकरणाचा पुढील तपास सुरू आहे.
पोलिसांनी दिलेल्या माहितीनुसार, ४ ऑगस्ट रोजी दुपारच्या सुमारास पीडित मुलगी वाल्मिक नगर परिसरात खेळत होती. त्यावेळी आरोपीने हातवारे करून तिला जवळील महिलांच्या सार्वजनिक शौचालयात बोलावले. मुलगी आत गेल्यानंतर त्याने शौचालयाचा दरवाजा बंद करून तिच्यासोबत अश्लील कृत्य केल्याचा आरोप आहे.
दरम्यान, शौचालयात काही संशयास्पद हालचाल सुरू असल्याचा संशय परिसरातील नागरिकांना आला. त्यांनी दरवाजा ठोठावल्यानंतर आरोपीने दरवाजा उघडला. त्यानंतर नागरिकांनी मुलीची सुटका करत आरोपीला पकडले. संतप्त जमावाने आरोपीला चोप दिल्यानंतर त्याला पनवेल शहर पोलिसांच्या ताब्यात देण्यात आले.
View this post on Instagram
घटनेची माहिती मिळताच पोलिसांनी आरोपीविरोधात पोक्सो कायद्यान्वये गुन्हा नोंदवून त्याला अटक केली. या प्रकरणाचा अधिक तपास पनवेल शहर पोलीस करत आहेत.
