पुणे : अनेक दिवसांपासून कर्जमाफीच्या प्रतीक्षेत असलेल्या लाखो बळीराजासाठी ही एक मोठी आनंदाची माहिती समोर आली आहे.शासनाकडून ‘अहिल्यादेवी होळकर शेतकरी कर्जमाफी योजना’अंतर्गत पहिल्या हप्त्याचे वितरण यशस्वीरीत्या पार पडले आहे.
या योजनेच्या माध्यमातून सुमारे 6.22 लाख पात्र शेतकऱ्यांच्या बँक खात्यावर 5029 कोटी रुपयांची रक्कम थेट ट्रान्स्फर करण्यात आली आहे. मुख्यमंत्री देवेंद्र फडणवीस यांनी एका क्लिकद्वारे ही रक्कम शेतकऱ्यांच्या खात्यावर हस्तांतरित केली. ज्या शेतकऱ्यांचे आधार प्रमाणीकरण (Aadhaar authentication) पूर्ण झाले होते, त्यांच्या कर्ज खात्यांमध्ये ही रक्कम लगेच जमा करण्यात आली आहे.
राज्य सरकारने जाहीर केलेल्या या नवीन योजनेनुसार, राज्यातील पात्र शेतकऱ्यांचे 2 लाख रुपयांपर्यंतचे थकीत कर्ज माफ केले जात आहे. या योजनेची प्रत्यक्ष अंमलबजावणी आता वेगाने सुरू झाली असून, टप्प्याटप्प्याने इतर सर्व पात्र लाभार्थ्यांनाही याचा फायदा दिला जाणार आहे.
ज्या शेतकऱ्यांना कर्जमाफीचा लाभ मिळाला आहे, त्यांना आगामी खरीप हंगामासाठी तातडीने नवीन पीक कर्ज उपलब्ध करून द्यावे, असे स्पष्ट निर्देश राज्य शासनाने सर्व बँकांना दिले आहेत. यामुळे शेतकऱ्यांना शेतीकामासाठी वेळेवर आर्थिक मदत मिळणे सोपे होणार आहे.
ज्या पात्र शेतकऱ्यांचे आधार प्रमाणीकरण अजून पूर्ण झालेले नाही, त्यांनी ते लवकरात लवकर पूर्ण करून घेणे गरजेचे आहे. प्रमाणीकरणाची प्रक्रिया पूर्ण होताच उर्वरित शेतकऱ्यांच्या खात्यावर देखील कर्जमाफीची रक्कम टप्प्याटप्प्याने वर्ग केली जाईल, असे प्रशासनाकडून स्पष्ट करण्यात आले आहे. या निर्णयामुळे राज्यातील शेतकरी वर्गात आनंदाचे वातावरण आहे.
