पुणे, ता. ७ : ऑनलाइन वाहन खरेदी-विक्री करणाऱ्या व्यावसायिकालाच सायबर भामट्याने चलाखीने जाळ्यात ओढत तब्बल १ लाख १० हजार रुपयांची फसवणूक केल्याची धक्कादायक घटना पुण्यात उघडकीस आली आहे. रॉयल एनफिल्ड कॉन्टिनेंटल GT-650 दुचाकी विक्रीच्या बहाण्याने स्वतःला ‘सेकंड ओनर’ असल्याचे सांगत आरोपीने विश्वास संपादन केला. पैसे ऑनलाइन घेतल्यानंतर गाडी देण्यास नकार देत फसवणूक केल्याचा प्रकार समोर आला आहे.
याप्रकरणी भाग्येश राजेंद्र झोरी (वय २४, रा. सेनापती बापट रोड, पुणे) यांनी तक्रार दिली असून दिनेश वर्मा (पूर्ण नाव व पत्ता अज्ञात, मोबाईल क्र. 9780451629) याच्याविरुद्ध फसवणुकीचा गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी भाग्येश झोरी हे बावधन येथे जुन्या दुचाकींच्या खरेदी-विक्रीचा व्यवसाय करतात. सोशल मीडियासह त्यांच्या वेब पोर्टलद्वारे ग्राहकांशी संपर्क साधून व्यवहार केले जातात.
२३ जुलै रोजी त्यांच्या व्यावसायिक क्रमांकावर एका व्यक्तीकडून रॉयल एनफिल्ड कॉन्टिनेंटल GT-650 (क्रमांक 23BH8536F) विक्रीसाठी असल्याची माहिती आली. दुसऱ्या दिवशी आरोपीने स्वतःचे नाव दिनेश वर्मा असल्याचे सांगत तो गाडीचा सेकंड ओनर असल्याचा दावा केला. गाडी खराडी येथील सोसायटीत पाहण्यासाठी बोलावण्यात आले. तेथे विक्रांत भारद्वाज नावाच्या व्यक्तीने गाडी दाखवून टेस्ट राईडलाही दिली. सर्व कागदपत्रे व्हॉट्सॲपवर पाठवून आरोपीने विश्वास संपादन केला.
सुरुवातीला दीड लाख रुपये मागणाऱ्या आरोपीने वडिलांच्या उपचारासाठी तातडीने पैशांची गरज असल्याचे कारण सांगत व्यवहार १.३० लाख रुपयांत निश्चित केला. मात्र, मूळ आरसी कार्ड उपलब्ध नसल्याने फिर्यादीने २० हजार रुपये रोखून ठेवत १.१० लाख रुपये ऑनलाइन आरोपीने पाठवलेल्या QR स्कॅनरवर जमा केले.
पैसे मिळाल्यानंतर मात्र आरोपीने गाडी ताब्यात देण्यास टाळाटाळ केली. यानंतर स्थानिक पोलिसांना बोलावण्यात आले. चौकशीत धक्कादायक माहिती समोर आली. विक्रांत भारद्वाज हा आरोपीचा मित्र नसून गाडीच्या मूळ मालकाचा मित्र असल्याचे स्पष्ट झाले. OLX वरील जाहिरात पाहून दिनेश वर्माने त्याच्याशी संपर्क साधला होता आणि जास्त किंमत मिळवून देण्याचे आमिष दाखवत त्याचाही विश्वास जिंकला होता.
यामुळे आरोपीने एकाच वेळी गाडीचा मूळ मालक, त्याचा मित्र आणि खरेदीदार अशा तिघांचीही दिशाभूल करून पैसे स्वतःच्या खात्यात वळविल्याचे उघड झाले. विशेष म्हणजे, फिर्यादीने भरलेल्या १.१० लाख रुपयांपैकी एक रुपयाही मूळ मालकाला मिळाला नसल्याचे तपासात समोर आले.
दरम्यान, या प्रकरणामुळे ऑनलाइन वाहन खरेदी-विक्री करताना केवळ कागदपत्रे किंवा व्हॉट्सॲपवरील माहितीवर विश्वास न ठेवता, मूळ मालकाशी प्रत्यक्ष संपर्क करून आणि रक्कम थेट त्याच्याच खात्यात जमा करण्याची गरज पुन्हा अधोरेखित झाली आहे.
