पुणे: हिंजवडी परिसरातील रस्त्यांवरील खड्ड्यांचा प्रश्न गंभीर बनला असून, त्याकडे दुर्लक्ष करणाऱ्या संबंधित अधिकाऱ्यांना आता थेट इशारा देण्यात आला आहे. खड्ड्यांमुळे अपघात होऊन एखाद्याचा मृत्यू झाल्यास संबंधित कार्यकारी अभियंता आणि ठेकेदाराविरोधात गुन्हा दाखल करण्याच्या सूचना पोलिसांना देण्यात आल्याचे जिल्हाधिकारी जितेंद्र डुडी यांनी स्पष्ट केले.
हिंजवडीतील रस्त्यांची दुरुस्ती आणि खड्डे बुजवण्याचे काम 30 सप्टेंबरपर्यंत पूर्ण करण्याचे आदेश यापूर्वी देण्यात आले होते. मात्र, ही मुदत संपल्यानंतरही काही ठिकाणी काम बाकी असल्याचे आढळून आले. त्यामुळे उर्वरित दुरुस्तीची कामे पूर्ण करण्यासाठी आता आणखी 7 दिवसांची अंतिम मुदत देण्यात आली आहे.
चाकण आणि हिंजवडी परिसरातील विविध समस्यांचा आढावा घेण्यासाठी उच्चस्तरीय कृती दलाची बैठक घेण्यात आली. या बैठकीत रस्ते, वाहतूक व्यवस्था, नाले, अतिक्रमणे आणि इतर पायाभूत सुविधांवर चर्चा झाली. यावेळी जिल्हाधिकारी डुडी यांनी संबंधित विभागांच्या अधिकाऱ्यांना आवश्यक सूचना दिल्या.
दरम्यान, फक्त खड्डे बुजवून समस्या सोडवण्याऐवजी पावसाचे पाणी वाहून नेण्यासाठी योग्य आणि कायमस्वरूपी स्टॉर्म वॉटर ड्रेनेज व्यवस्था उभारण्याचे निर्देश देण्यात आले आहेत.
चाकण भागातील नाल्यांवर झालेली अतिक्रमणे हटवण्यासाठी MIDC आणि PMRDA यांनी एकत्रितपणे कारवाई करावी, असेही सांगण्यात आले.
