डॉ. अशोक बालगुडे
पुणे, ता. 23 : हडपसर-सासवड रस्त्यावर सातववाडी बसथांब्यावर पीएमपीएमएल बसमधून उतरत असताना चालकाने अचानक दरवाजा बंद केल्याने एक मुलगी दरवाजात अडकून रस्त्यावर पडून जखमी झाल्याची घटना घडली. सुदैवाने मुलीला गंभीर दुखापत झाली नाही; मात्र चालकाच्या घाईमुळे दुर्घटना घडली.
बस थांब्यावर आल्यानंतर दरवाजा उघडण्यात आला. मुलगी बसमधून उतरत असतानाच चालकाने अचानक दरवाजा बंद केला. त्यामुळे ती दरवाजात अडकून रस्त्यावर पडली. घटनेनंतर नागरिकांनी तत्काळ घटनास्थळी धाव घेतली. जनसेवक प्रशांत सुरसे यांनीही घटनास्थळी पोहोचून चालकाला जाब विचारला. प्रवासी बसमधून उतरत असताना दरवाजा अचानक बंद करण्याचे कारण काय, असा सवाल त्यांनी चालकाकडे केला.
दरम्यान, चालकाच्या घाई आणि निष्काळजीपणामुळे हा प्रकार घडल्याचा आरोप नागरिकांनी केला असून, प्रवाशांच्या सुरक्षिततेकडे दुर्लक्ष करणाऱ्या संबंधित चालकावर पीएमपीएमएल प्रशासनाने चौकशी करून कठोर कारवाई करावी, अशी मागणी नागरिकांकडून करण्यात आली आहे.
