लोणी काळभोर, ता. 27 : लोणी काळभोर (ता. हवेली) येथील इंग्लिश मीडियम स्कूल ही शाळा केवळ शैक्षणिक गुणवत्तेसाठीच नव्हे तर विद्यार्थ्यांच्या सर्वांगीण विकासासाठी राबविल्या जाणाऱ्या विविध उपक्रमांमुळे परिसरात विशेष ओळख निर्माण करत आहे. विद्यार्थ्यांच्या लपलेल्या कलागुणांना वाव मिळावा यासाठी वर्षभर स्पर्धा, उपक्रम आणि विविध परीक्षांचे आयोजन केले जात असून त्याचा सकारात्मक परिणाम विद्यार्थ्यांच्या कामगिरीत दिसून येत आहे.
शैक्षणिक वर्षभरात विद्यार्थ्यांनी धावणे, कबड्डी, खो-खो यांसारख्या क्रीडा प्रकारांत उत्कृष्ट कामगिरी करत शालेय, आंतरशालेय तसेच जिल्हा व राज्यस्तरीय स्पर्धांमध्ये अनेक पारितोषिके पटकावली आहेत. क्रीडाक्षेत्रासोबतच शैक्षणिक स्पर्धांमध्येही विद्यार्थ्यांनी आपल्या गुणवत्तेची छाप पाडली आहे.
शिष्यवृत्ती परीक्षा, नवोदय प्रवेश परीक्षा, क्रीडाक्षेत्रातील स्पर्धा, ऑलिम्पियाड तसेच डॉ. होमी भाभा परीक्षा यांसारख्या विविध स्पर्धात्मक परीक्षांमध्ये विद्यार्थ्यांनी उल्लेखनीय यश संपादन केले आहे. अनेक विद्यार्थी गुणवंत यादीत झळकत असून शाळेच्या शैक्षणिक दर्जाची साक्ष देत आहेत.
दहावीचा शंभर टक्के निकाल – शाळेची खास ओळख
दरवर्षी दहावीचा १०० टक्के निकाल लागणे ही या शाळेची विशेष परंपरा ठरली आहे. गुणवंत विद्यार्थ्यांसोबतच अभ्यासात मागे असलेल्या विद्यार्थ्यांवरही शिक्षकांकडून वैयक्तिक लक्ष देण्यात येते. त्यामुळे प्रत्येक विद्यार्थ्याचा शैक्षणिक स्तर उंचावण्यास मदत होत आहे.
आधुनिक शिक्षणपद्धती आणि अनुभवी शिक्षकवर्ग
आधुनिक अध्यापन पद्धती, डिजिटल सुविधा, अनुभवी शिक्षकवर्ग आणि विद्यार्थीकेंद्रित उपक्रम यांचा उत्तम संगम या शाळेत पाहायला मिळतो. यामुळे पालकांचा शाळेवरील विश्वास दिवसेंदिवस अधिक दृढ होत आहे.
