Parth Pawar Land Scam: उपमुख्यमंत्री अजित पवार (Ajit Pawar)) यांचे सुपुत्र पार्थ अजित पवार संचालक असलेल्या ‘Amadea Holdings LLP’ कंपनीने पुण्यातील 1804 कोटी रुपये बाजारमूल्य असलेली ‘महार वतना’ची जमीन केवळ 300 कोटी रुपयांना विकत घेतली आणि त्यावरील सुमारे 21 कोटी रुपयांची मुद्रांक शुल्क (Stamp Duty) माफ करवून घेतल्याच्या कथित गैरव्यवहारप्रकरणी ज्येष्ठ नेते शरद पवार (Sharad Pawar) यांनी महत्त्वपूर्ण भूमिका मांडली आहे.
विरोधक अजित पवार यांच्या राजीनाम्याची मागणी करत असताना, शरद पवार यांनी थेट नातू पार्थ पवार यांच्या भूमिकेवर भाष्य करत, या प्रकरणाची सखोल चौकशी व्हावी, अशी मागणी केली आहे.
चौकशीतून सत्य समोर यावे
या प्रकरणावर बोलताना शरद पवार म्हणाले की, पुण्यातील कोरेगाव पार्क जमीन घोटाळ्याचा विषय ‘गंभीर’आहे. हा एक गंभीर विषय आहे. या प्रकरणाची सखोल चौकशी करून सत्य समाजासमोर ठेवले पाहिजे. पवार यांनी कुटुंब आणि राजकीय बाबींमध्ये स्पष्ट अंतर ठेवत “कुटुंब आणि राजकारण या दोन्ही वेगवेगळ्या गोष्टी आहेत,” असे त्यांनी ठामपणे सांगितले आहे.
सुप्रिया सुळेंच्या वक्तव्यावर स्पष्टीकरण
यापूर्वी पार्थ पवार यांची पाठराखण करणाऱ्या खासदार सुप्रिया सुळे यांच्या वक्तव्यावरही त्यांनी स्पष्टीकरण दिले. पवार म्हणाले की, “सुप्रिया सुळे यांचे वक्तव्य हे वैयक्तिक होते. सुप्रियाला तिचे स्वतःचे मत असू शकते. ”
पार्थवर गुन्हा का नाही?
या प्रकरणी पार्थ पवारांवर गुन्हा दाखल का झाला नाही, या प्रश्नाचे उत्तर त्यांनी थेट सरकारकडे टोलवले. “याबद्दल देवेंद्र फडणवीसच सांगू शकतील,” असे शरद पवार म्हणाले. तसेच, ‘तेजवानी’ नावाच्या व्यक्तीबद्दल आपल्याला माहिती नसून, प्रशासनाने त्यांना शोधून काढावे, अशी ते म्हणाले.
राज्य सरकारने या प्रकरणाची चौकशी करण्यासाठी समिती स्थापन केली आहे. प्रशासकीय आणि कौटुंबिक गोष्टी वेगवेगळ्या ठेवत चौकशीतून सत्य बाहेर येईल अशी अपेक्षा पवारांनी व्यक्त केली आहे.
