वॉशिंग्टन/तेहरान: अमेरिका, इस्रायल आणि इराण यांच्यातील संघर्ष आणखी शिगेला पोहोचले आहे. हे युद्ध आता केवळ सीमेपुरते मर्यादित न राहता जागतिक अर्थव्यवस्थेला हादरा देणाऱ्या वळणावर आले आहे. इराणच्या अण्वस्त्र आणि लष्करी हालचालींचे केंद्र असलेल्या इस्फाहानला अमेरिकेने लक्ष्य केले आहे. ‘पेनिट्रेटर’ किंवा ‘बंकर-बस्टर’ बॉम्ब हे जमिनीच्या खोलवर असलेली काँक्रीटची बांधकामे उद्ध्वस्त करण्यासाठी वापरले जातात. इराणचे अधिकारी अकबर सालेही यांनी या लष्करी तळांवरील नुकसानीची पुष्टी केली आहे. या हल्ल्यामुळे इराणची मोठी लष्करी हानी झाली असून, अमेरिकेने इराणला संपवण्याचा पवित्रा घेतल्याचे स्पष्ट दिसत आहे.
इराणचा पलटवार
अमेरिकेच्या या लष्करी कारवाईला इराणने अत्यंत घातक पद्धतीने उत्तर देण्याची तयारी दर्शवली आहे. इराणच्या रिव्होल्युशनरी गार्ड्सने (IRGC) 18 प्रमुख अमेरिकन कंपन्यांची यादी जाहीर केली असून, भविष्यात इराणी नेत्यांना लक्ष्य केल्यास या कंपन्यांवर हल्ले करण्याची धमकी दिली आहे. यात Google, Microsoft, Apple, Meta, Nvidia, Tesla, डेल, पालेंटिर, एनवीडिया, जेपी मॉर्गन, इंटेल, सिस्को, एचपी, ओरॅकल, आयबीएम, जनरल इलेक्ट्रिक, स्पायर सोल्यूशन्स, G42 आणि बोइंग सारख्या दिग्गज कंपन्यांचा समावेश आहे.
इराणचा दावा आहे की, या कंपन्या अमेरिकन आणि इस्रायली गुप्तचर यंत्रणांना तांत्रिक मदत करत असून इराणविरुद्धच्या सायबर युद्धासाठी जबाबदार आहेत. इराणचे ब्रिगेडियर जनरल जमशेद इशाकी यांच्या हत्येनंतर बदला म्हणून अमेरिकेच्या या बड्या कंपन्यांवर हल्ला करण्यात येणार आहे.
विशेषतः दुबई आणि अबुधाबीमध्ये या कंपन्यांची कार्यालये असल्याने आखाती देशांतील कॉर्पोरेट क्षेत्रात आता भीतीचे वातावरण आहे.
