बारामतीत ‘बिग बुल’चा मोठा घोटाळा! १० ते १५ टक्के परताव्याचे आमिष दाखवून फसवणूक; दोघांवर गुन्हा दाखल

बारामती, (पुणे) : शेअर मार्केट, फॉरेक्स ट्रेडिंग आणि निश्चित परताव्याच्या आमिषाने गुंतवणूकदारांची फसवणूक केल्याप्रकरणी बारामती शहर पोलीस ठाण्यात दोघांविरुद्ध गुन्हा दाखल करण्यात आला आहे. कार्तिक अरविंद नाळे, गौरव अरविंद नाळे, BIG BULL INSTITUTE OF TRADING & FINANCE आणि BIG BULL TRADING COMPANY यांच्याविरोधात गुन्हा दाखल करण्यात आला आहे.

आणखी अनेक गुंतवणूकदार फसवणुकीचे बळी ठरले असण्याची शक्यता व्यक्त करत पोलिसांनी नागरिकांना पुढे येण्याचे आवाहन केले आहे. बारामती शहर पोलीस ठाण्यात गुन्हा रजि. नं. 249/2026 अन्वये भारतीय न्याय संहिता, 2023 मधील कलम 316(2), 318, 340 सह 3(5) तसेच महाराष्ट्र ठेवीदारांच्या हितसंरक्षण अधिनियम, 1999 च्या कलम 3 अंतर्गत गुन्हा नोंद करण्यात आला आहे.

पोलिसांनी दिलेल्या माहितीनुसार, आरोपींनी स्वतःला शेअर मार्केटमधील अनुभवी ट्रेडर, गुंतवणूक तज्ज्ञ तसेच SEBI मान्यताप्राप्त व्यक्ती असल्याचा आभास निर्माण करून नागरिकांना विविध गुंतवणूक योजनांमध्ये सहभागी होण्यासाठी प्रवृत्त केल्याचा आरोप आहे. काही गुंतवणूकदारांना दरमहा 10 ते 15 टक्के निश्चित परतावा, मूळ रक्कम सुरक्षित राहील तसेच तोटा झाल्यास जबाबदारी स्वतः घेण्याची आश्वासने देण्यात आल्याचेही तपासात समोर आले आहे.

 

UPI, NEFT, RTGS, IMPS, बँक ट्रान्सफर किंवा धनादेशाद्वारे पैसे दिलेल्या व्यक्तींनी संबंधित पुराव्यांसह बारामती शहर पोलीस ठाण्यात तात्काळ संपर्क साधावा, असे पोलिसांनी स्पष्ट केले आहे. पोलीस अधीक्षक संदीप सिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी डॉ. सुदर्शन राठोड आणि प्रभारी पोलीस निरीक्षक श्रीशैल चिवडशेट्टी यांच्या मार्गदर्शनाखाली या प्रकरणाचा तपास पोलीस उपनिरीक्षक रत्नदीप भंडारे करीत आहेत.

पोलिसांच्या हाती बँक व्यवहार, करारनामे, धनादेश, इलेक्ट्रॉनिक संदेश आणि इतर महत्त्वाचे पुरावे लागले असून अनेक गुंतवणूकदारांनी मोठ्या प्रमाणावर रक्कम गुंतविल्याचे उघड झाले आहे. ‘बिग बुल’च्या माध्यमातून गुंतवणूक केलेल्या सर्वांनी पुढे यावे, असे आवाहन बारामती शहर पोलिसांनी केले आहे.

दरम्यान, फसवणूकग्रस्तांना न्याय मिळवून देणे आणि या प्रकरणातील संपूर्ण सत्य समोर आणणे हेच बारामती शहर पोलीस ठाण्याचे प्रमुख उद्दिष्ट असल्याचे पोलिसांनी सांगितले आहे. तसेच नागरिकांनी दिलेली माहिती आणि कागदपत्रांची गोपनीयता राखली जाईल, असेही पोलिसांनी स्पष्ट केले आहे.