लोणी काळभोर, ता.25 : कौटुंबिक वादातून एका विवाहितेने विहिरीत उडी मारून आत्महत्या केल्याची धक्कादायक घटना घडली आहे. ही घटना कदमवाकवस्ती (ता.हवेली) ग्रामपंचायत हद्दीतील राईलकर हॉस्पिटल परिसरात घडली असून गुरुवारी (ता.24) दुपारी दोन वाजण्याच्या सुमारास उघडकीस आली आहे. या घटनेमुळे परिसरात एकच खळबळ उडाली आहे.
स्वाती विजय कांबळे (वय – 26, राईलकर हॉस्पिटल जवळ, कदमवाकवस्ती, ता. हवेली, जिल्हा पुणे) असे आत्महत्या करण्यात आलेल्या विवाहितेचे नाव आहे. मिळालेल्या माहितीनुसार, स्वातीची घरात किरकोळ भांडणे झाली होती. या भांडणाचा राग मनात धरून स्वातीने थेट विहिरीत उडी मारली. या घटनेची माहिती तत्काळ लोणी काळभोर पोलिसांना दिली. व रेस्क्यू टीम तत्काळ घटनास्थळी दाखल झाले. रेस्क्यू टीमने त्वरित स्वाती कांबळे यांना बाहेर काढले. व महाराज ॲम्बुलन्स सेवाच्या माध्यमातून लोणी काळभोर येथील प्राथमिक आरोग्य केंद्रात उपचारासाठी दाखल केले. परंतु तेथील डॉक्टरांनी स्वाती कांबळे यांचा उपचारापूर्वीच मृत्यू झाल्याचे घोषित केले.
दरम्यान, स्वाती कांबळे यांचा मृत्यू देह लोणी काळभोर पोलिसांनी ताब्यात घेतला असून शवविच्छेदन करण्यासाठी पुण्यात पाठविला आहे. शवविच्छेदनाचा अहवाल आल्यानंतर मृत्यूचे खरे कारण पुढे येईल. तरी पुढील तपास लोणी काळभोर पोलीस ठाण्याचे पोलीस हवलदार चंद्रकांत माने करत आहेत.
